係好多人心目中，我同 WC 都係怪人，我地外表平凡，生活平淡，我地鐘意嘅其他人未必鐘意；一般人好嗰 D，我地好似幾經努力，都唔係咁熱衷，我地就係喺我地自己嘅生活空間裡面用自己嘅方式生活。
暫時我個 BLOG 寫得最多嘅係煮嘢食，其實我唔算鐘意煮，只係年紀大咗，一次又一次係出面 D 食店失望而回，個人就開始懷疑，真係有咁難？我好好奇嗰過程﹝如何去整﹞，同埋如果呢個整法﹝抄返嚟嘅食譜﹞如果唔啱我，咁我要改 D 咩先得呢？咁我如果知道咗，就唔駛下下食一 D 我覺得唔啱我口味嘅嘢。
通常同一種食物我會去一 D 比較出名嘅試下，如果合食又價錢合理，我就唔會考慮自己整，但如果唔合味或好貴或食店好隔涉或我地有 D 好特別嘅要求，咁我就會試下自己整。
最初我係 internet 抄食譜，跟住試同改，我試完改完又合味之後，就會抄係筆記簿，再下次再整其實我只係會跟住筆記簿照整，所以 D 人係呢度見到嘅其實係我試過 (佢試食過 ) N 次嘅成果，我絕對唔保證你會鐘意食，因為一開始呢個 (啱唔啱其他人) 就唔係我最大 concern。 嗰 BLOG 入面講食嗰 D 只係我筆記簿入面資料嘅圖文並照版。之前無寫 BLOG 係因為我中文打字極慢，而且我習慣咗用筆記簿，最近我本筆記簿就嚟用完，一來又要選一本啱心水嘅筆記簿唔係咁易，二來 technically 用 BLOG 記低係會比較 last 得耐 D。
我比較有興趣嘅其實係電影同睇書，攝影暫時只係我用嚟記錄嘅工具，唔稱得上有好大興趣，加上係完全新手，要花多 D 時間先可以再講。講返電影，我最鐘意 Zombie 同 Vampire 類，唔知點解，反正有做就會去睇，同埋內心深處係相信呢個世界係有呢兩樣嘢，其他類型嘅電影，有就會睇，好出名 / 好經典 / 好票房 都會睇，比較鐘意係屋企睇，貪有 D 細節 miss 咗可以即時睇返，同埋如果某個 point 有嘢想 問 / 講 可以停一停，等一等。至於睇書，基本上咩書都睇，可惜因為英文唔好，睇得太慢，我相信我已經錯過咗好多好書，我其實都鐘意儲書，但從來唔敢隨心所欲咁買，因為咁耐都未試過住係自己物業入面，唔係無買過，只係有某 D 原因無住到，其實身邊有 D 朋友都有類似情形 (即係供就得你嗰份，住就大家有份)，我都唔算係最差嗰個，人呢，有時都需要自我平衡一下嘅！
我打算盡量抽時間係呢個 BLOG，作為我同佢生活嘅記錄，希望我會 keep 到啦!!!
No comments:
Post a Comment