伊沙貝拉

上星期就做韓片原罪犯，今星期就做港片伊沙貝拉，兩套戲講嘅嘢完全唔同，除咗大家個故仔都有 D 涉及小小亂倫呢個題目。

雖然原罪犯係喺最後先俾觀眾知道原來吳大秀同美道係兩父女，但我記得第一次睇時，當做到佢地發生關係時，我硬係覺得有 D 唔妥，到後來諗返 (我當然唔係咁醒目當時就估到佢地係父女)，覺得唔妥嘅係我當時以為美道係一個好開放嘅女仔，因為美道其實一開始就想同吳大秀上床，但戲入面嘅吳大秀又唔靚仔又唔覺有咩特別嘅魅力，無理由一個青春少艾三唔識七只係識咗幾個鐘就帶人返屋企，怎至當吳大秀想夾硬嚟時，美道拒絕之後仲要好內疚咁講要有 D 心理準備先至同佢上床 (咁講即係話係遲早會啦！)。到後來佢地真係發生關係時，原來美道仲係處女，咁即係佢唔會係好開放嘅人，呢度就解釋唔到佢對吳大秀個種莫名其妙嘅好同為何無情情會愛上佢嘅心理，就因為呢件事太吊詭，所以套戲越睇就越覺得不安。

到睇伊沙貝拉時，套戲開始無耐就交待馬振成同阿欣上咗床同埋係兩父女，我反而無個種不安嘅感覺，唔係我覺得亂倫無問題，而係我知道如果係香港戲院上得嘅戲，根本無人夠膽咁正面講呢 D 題材，如果一開始就講得咁白嘅就一定唔會係真亂倫，到最後一定會出嚟交待只係一個誤會。有陣事都覺得香港嘅電影人同想睇香港電影嘅人其實都幾慘，拍嚟拍去 / 睇嚟睇去都係嗰 D 題材，D 敏感 DD 嘅就無人敢拍，唔係上唔到大陸就係有本地超級衛道之士呱呱嘈，唔通係一個完全隔絕一切聲色犬馬資訊嘅環境係真係對社會係絕對好事？

講返伊沙貝拉，我對個故仔無特別大嘅感覺，對於拍攝手法嗰方面，我完全係外行，只可以講拍得都算幾靚；戲入面嘅演員，我知道梁洛施小姐好似憑呢套戲得咗某影展嘅影后，無可否認佢係做得唔錯，但我更喜歡杜汶澤先生演繹嘅司警馬振成，佬味十足，見得到馬振成呢個麻甩佬係 "遇返個女" 前後嘅轉變，眼神，表情，講對白同肢體動作都交足戲，比起杜汶澤先生之前其他戲入面嘅角色有發揮得多，睇戲唔一定要睇靚仔靚女，反而多 D 呢種 "你我他" 嘅角色咪仲會令人投入 D。