廢物利用~焗雞肶骨

我估好多人都可能會知，喺外國買雞肉，同香港最大嘅分別係，呢度雞肶雞翼比雞胸平好多，所有有陣事我都會買雞肶返嚟起肉去皮，然後再用嚟煮餸。我起雞肶肉唔係好得，唔夠貼，都有考慮過要唔要買把起骨刀。你可能會問: 「咁唔可以買起咗骨嗰 D 雞肶肉咩? 」當然可以啦！係貴唶，依度普通雞肶賣 AU$2.99~4.99 1kg，起咗骨嗰 D 最平都要 AU$8.99 1kg，我呢 D C9 仔寧願自己起肉啦，最初嗰幾次，起完肉 D 雞骨我會掉咗，但正如我頭先所講-"我起雞肶肉唔係好得"，睇見仲有好多肉係條骨度，要諗諗可以點用咗佢...

我都試過唔同方法去處理 D 雞肶骨，試過用椒鹽整，味道唔錯但好麻煩好多功夫 (事前/後); 又試過用老水方法，功夫少 D ，味道又係唔錯，但之後 D 老水又要儲存; 之後俾我試到依家呢個整法，用焗，一來嗰軟骨 D 油會焗咗出嚟，二來焗完個雞肶骨會比較乾身，可以用手揸住食，唔會有汁滴到成手都係，三來味道梗係好啦！唔係我都懶得哂時間打呢篇嘢呀！

<< 材料 >>
雞肶骨 700g
老抽 2 tbsp
生抽 1 tbsp
叉燒醬 1 tbsp
糖 1 tbsp

<< 整法 >>
將所有材料撈埋一齊，用保鮮袋袋好 (因為雞肶骨大枝難撈到 D 調味料，用保鮮袋效果會比較好)，醃過夜。食前 1 個鐘，200 度預熱焗爐，將雞肶骨平均排喺焗架上。


200 度焗 20 分鐘，再轉 180 度焗 20 分鐘，OK 食得！配啤酒~~~~~~~正！