WC & ML

Taiwanese Beef Noodle 台灣紅燒牛肉手工麵

2010-06-26T00:14:00.000-07:00

Preparation time: 2010.06.24~2010.06.25
Eating time: 30mins

We made the noodle as well, the ratio of water and flour is 1:3 (provided that you are strong enough to manage) or more water for easy processing.

After mixing the water and flour well, wait for 30mins and roll it flat.

Fold and cut it according to your preference.

Before you cook it, use some flour to keep the noodle dry. For better result, please use Italian 00 plain flour.

Boil the noodle, try it to decide whether it is cooked. This is chinese food, 'al dente' is not what you want.

The recipe of the taiwanese beef soup is from another blog, the blog name is in the photo.

Good! Good! Good!

The noodle tastes exactly like what we tried in Taiwan...........

手作仔 Project ~ 碎皮口金包 (續)

2010-06-13T06:46:00.000-07:00

有咗碎皮，我再係 ebay 買咗個口金框，本來應該要等下睇買唔買到皮革工具，但我好心急，所以喺世界杯開鑼嗰日就開始整啦！
With that small piece of leather off-cut, I also bought a coin purse frame from ebay. At first, I wanted to see if I could buy a set of second hand leather craft tools, however, I couldn't control myself but kick-off the project on the first day of World Cup 2010.

之前喺另一次 "garage sales" 用咗 $5 買嘅呢塊 cutting mat 呢次大派用場。由於我從來都未學過整口金包或者係皮具，我都係自己估估下同參考我用緊嘅口金包。
I bought a cutting mat some days before (@ garage sales with $5), which really helped this project. I never learnt how to make coin purse or leather craft, I used my "wild guess" and took my existing coin purse as a reference.

好彩有塊 cutting mat，我用佢嚟對齊塊皮同畫線，因為無銀筆，我用普通原子筆嚟畫塊皮。
With the help of the cutting mat, I was able to align the leather in order to have proper measurement and marking. I used normal ball pen for marking since I didn't have silver pen.

第二個好彩，塊皮啱啱夠大。
Cross finger!!! The leather was just big enough for my coin purse.

剪完塊皮，再要準備口金包嘅內層。我用咗一塊比較厚嘅布碎，呢塊布碎喺好耐之前我整 cushion 用剩。
After cutting the leather, I used a piece of fabric to prepare the coin purse inside layer.

塊裡布只係照住塊皮劃線照剪 (之後先發覺其實裡布要剪細小小)。
I used the leather to outline the cutting area of the fabric (later I found out I should have cut the fabric a little bit smaller than the leather).

我比較用慣夾，因為實在俾大頭針拮過太多次。
I prefer using clips instead of pins (due to so many bad experience :( ).

整咗嗰底先，第一步...
To make the flat bottom, you need to first...

然後...
Then...

由於從未整過，估計應該有其他方法 (更好嘅) 整個底。
I think there are other ways (better) to do this.

外面睇會係咁樣。
Look from outside.

外面嗰層皮我都係做相同嘢，但因為皮比布厚好多，效果唔算太好，其實我一早知會咁，因為睇過 D 皮革書，我工具唔啱，線唔啱，方法唔啱，縫得埋算 OK 架啦！
I did the same to the leather, but the result was not as good as the inside fabric due to the thickness of the leather.

完成 (表面圖)
Finished Product (what you can see from surface)

如果睇埋入面就會知佢有咩不足之處啦！ ;P
Of course some defects are expected if you take a inside look！ ;P

後面黑色嗰個就係我依家個口金。
The behind coin purse is my existing one.

我打算係買到二手工具之後，再買 D 碎皮試下，希望唔駛等好耐啦！
I hope I can manage to make another one after my collection of second hand craft tools, won't be long!

手作仔Project~~翻新木盒

2010-06-09T00:17:00.000-07:00

有一日同 WC 經過 Richmond，見到有 garage sales，俾我見到件好嘢，於是用咗 AU$5 買咗返嚟，我想將佢改造成首飾盒。

呢個木盒睇落都有 D 歷史，但好彩 D 木料仲 OK，我無打算要花太多時間處理。

個木盒內裡嘅情況就差 D，嗰校位有小小生金秀，我估要換。仲有入面有一邊塊版無咗，但為咗統一D，我打算將佢換哂佢！

手作仔Project~~碎皮口金包

2010-06-08T23:47:00.000-07:00

除咗儲食譜，我好鐘意整 D 手作嘢，多數由買 D 二手或者係下欄嘢開始，然後慢慢諗吓點樣將佢變成啱我心水嘅，我無限自己用幾耐時間 (有時可能會爛尾 tim)。

最近有兩件小玩意整緊，第一樣係一塊用咗 AU$2 買返嚟嘅紅色羊皮。

我一路都想有一個皮嘅口金散紙包，但喺彷間見到嘅唔係唔啱心水就係太貴，咁嗰日星期六係 Dandenong Market 行街時，見到有檔賣皮料嘅舖頭有一箱碎皮，我就開始尋寶，最後俾我買到呢塊碎皮。

有皮唶，都唔知點開始，咁我就開始做 research，最簡單就先去 local library search 下，又俾我借到本書喎！但原來要好多工具，我要睇睇有無 second hand 工具賣。

我希望 keep 住記錄呢個紅色口金散紙包嘅製造過程，如果可以今年內完成就 prefect 啦！

我嘅嗜好~~儲食譜

2010-06-08T23:26:00.000-07:00

朋友 W 發 email 問我有無 website 介紹如何煮乾鮑？

煮乾鮑？咁大個人從未煮過，一來太貴，自己煮會有好太壓力；二來我同 WC 都係偏肥，一個唔覺意愛上的話就麻煩啦！

雖然我自己唔會煮，但我有乾鮑食譜。點解？因為我儲埋儲埋都唔少食譜，其中有齊黃又又如喺 Next Magazine 入面所寫過嘅文章，我每期睇完之後都會撕起黃小姐嗰兩頁，然後入落 folder，唔覺唔覺到依家已經有十多個 folder。

其實我好少照跟佢嘅食譜煮，但好鐘意閒時翻下。

失敗燒鴨肶

2010-06-01T03:30:00.000-07:00

我好鐘意食燒鴨，但屋企附近無得賣，買返嚟嗰 D，食完之後又好口渴，我估係佢地用咗好多味精嚟醃。

想左好耐要整，但雪櫃唔夠大放一隻鴨，而整燒鴨好多步驟... 最主要係我比較懶！

上星期六，買豬肉時見到有雪藏鴨肶賣，要 15.99 per kg，一時興起，不如試吓整燒鴨肶，嗰時係度諗，如果用整燒鴨嘅方法嚟整鴨肶，係咪會有燒鴨咁嘅效果呢？

由於係試驗關係，我無詳細記錄醃料份量。

用咗五香粉 + 沙薑粉 + 幼鹽醃鴨肶，放雪櫃下格兩日。

上皮，唔知點解，完全忘記要係水入面加醋同麥芽糖，淨係用滾水上皮，當時完全唔發覺，明明睇住個食譜，都唔知點解會無跟住做。

無料上皮之後，吊起風乾。

我就係風乾之後，先發覺上皮上錯咗，攪到無心機再映相，其實焗完出嚟嗰味都 OK，係個皮唔得，會再試，希望下次成功！

Pizza Crossover - Hawaiian+Seafood

2010-04-10T06:07:00.001-07:00

We made 3 small size pizza, ate two of them and left 1 to be frozen.

We used (for the pizza base):
300g of pizza flour
4g of dry yeast
4g of cooking salt
4g of sugar
120g of warm water
20g of olive oil
a little bit of Italian herb

Yummy!!!

Homemade Pizza - Hawaiian

2010-04-04T20:33:00.000-07:00

Melbourne Grand Prix 2010 @ Albert Park

2010-04-04T20:28:00.000-07:00

Body Canvas 2010 @ St Kilda Sea Bath

2010-04-04T20:01:00.001-07:00

沖天救兵 UP

2010-03-21T14:16:00.000-07:00

琴日又睇咗呢一套，唔錯唔錯，適合大人同細路。戲入面嗰個肥仔真係好得意，可惜現實中少有呢 D 路！

電影內容:-
為了遵守一個承諾，實現一個70年的夢想，卡叔用成千上萬個彩色氣球，把他的安樂窩升上天空，即使要歷盡艱險，都誓要直飛南美找到傳說中的「仙境瀑布」。誰知這個旅程加入了活力充沛、最愛整古做怪的8歲童軍小飛，將卡叔平靜的生活一百八十度大反轉﹗二人要面對逼到埋身的暴雨狂風、發現傳說中的珍禽異雀和識講多國語言的狗仔，仲要高空決戰神秘梟雄…總之今次卡叔同小飛要拍住上勇闖重重難關，齊齊展開一個超緊張勁刺激的飛天之旅﹗

殺人犯 Murderer

2010-03-21T13:54:00.000-07:00

唔係話套戲唔好睇，但如果你係兩套 (殺人犯同 Orphan) 都未睇的話，最好睇咗呢套先。

電影內容:-
凌光 (郭富城飾) 是一位年青有為的重案組總督察。他是警隊中的模範人物，入職多年屢破奇案，更即將晉升警司，堪稱最有前途的「未來警隊一哥」人選。凌光擁有幸福的家庭：妻子程希愛 (張鈞甯飾) 美麗溫柔、兒子活潑可愛，一家生活品味優雅。一幅美好人生的圖畫，卻因為一宗連環謀殺案而完全改寫！

凌光於調查一宗連環謀殺案期間突然昏倒，醒來後，不但發現自己失去了短期記憶，更發現他的好拍擋竟然死於同一現場，而他的拍擋更成為近日「連環放血凶案」的第三個受害者！兇手每次都用最殘暴冷血的手法，令受害者被放血至死！而兇手每次殺人後都消失得無影無蹤，令警方完全束手無策。

凌光升級在即的時候遇到這宗香港歷史上最殘暴的兇殺案，他自然不惜一切，全力緝捕兇手，更要還他死去的好拍擋一個公道。但在查案的過程中，他竟發現每一條線索、每一個證據，都接二連三地指向他就是兇手！他越深入追查，他的嫌疑竟然越來越大！凌光的短期記憶亦未能恢復過來….而逐漸連唯一可以信賴的證據 - 自己 - 都沒法證明他的清白！

一步一步地，凌光被迫向瘋狂崩潰的邊緣！到底…..他是不是兇手？

我地最唔鐘意嘅地方係最後用對白交待得太詳細，就好似其中一個角色突然變咗導遊一樣，將之前所有嘢 (包括作為觀眾的我應該覺得會唔合理嘅地方) 同埋一堆背景資料，係同一段長對白講出嚟，感覺呢段戲係完全為咗塞住觀眾的口，同觀眾講，"嗱嗱嗱... 成件事係絕對合情合理，所有嘢都有解釋架！"，真係俾佢吹到啤一聲！

孤疑 Orphan

2010-03-20T22:49:00.000-07:00

琴晚睇咗呢套戲，唔知係咪因為之前係影評知道咗小小戲情，所以無想像中咁驚。

電影內容:
年青夫婦凱蒂與約翰因為夭折的孩子而大受打擊，使他們的婚姻及凱蒂脆弱的心靈都蒙上陰影。夫婦二人決定要領養一個小孩以助他們走出陰霾，他們在孤兒院中遇上討喜的小女孩艾絲特時，便決定要把她帶回家。在艾絲特成為凱蒂家的一份子後，接二連三的怪事卻隨之發生，讓凱蒂禁不住相信，艾絲特並非普通的小女孩 – 她並非如外表一般的純真可愛。為了保護她的家人，凱蒂嘗試讓約翰及其他人看清楚艾絲特的真面目。只是，所有人都不理會她的警告，直到事情變得一發不可收拾……

套戲入面我最唔鐘意係個老公，由頭到尾咁多 hints 佢都唔相信，到後來到咗自己個仔都出咗事佢都唔覺得有問題，咁叫我地如何可以同情佢呢?

好多 BLOG 友都話呢套戲同郭富城嗰套 "殺人犯" 內容有 D 相似，我地打算今晚睇埋，睇完再講！

Camberwell Sunday Market

2010-03-13T19:54:00.000-08:00

今朝天氣唔錯，所以出去行吓，一早起身之後，就去咗 Camberwell Sunday Market，呢個 Sunday Market 每星期日朝早開，只賣手作同二手嘢，上次都買咗 D 嘢，今次都有 D 收穫。

可惜只有一張! 希望下次去又有好嘢啦！

落雹記

2010-03-10T12:58:00.000-08:00

星期六(2010.03.06)，外出買嘢返嚟無耐就天氣大變，跟住成個天黑哂，落起雹來，其實 MELBOURNE 耐唔耐都會落，不過呢次落得比較緊要。

Om Shanti Om

2010-03-05T06:39:00.001-08:00

今星期 SBS 係印度電影周，啱啱睇完 "Om Shanti Om" (如果愛在寶萊塢)，我只得一句評語--"好睇到暈"，勁歌熱舞，歌舞又多又長又精彩，內容我唔打啦，其他 BLOG 友都有好幾篇詳細介紹，有興趣可以睇吓下面呢篇 BLOG。

Om Shanti Om 如果愛‧在寶萊塢》: 嘩！見鬼魅影歌聲的發膠明星夢

相信我，睇咗包你唔會後悔！

挖蜆記 (下)

2010-02-09T17:27:00.000-08:00

有新鮮蜆，梗係要食啦！

由於 D 蜆要吐沙嘅關係，我地就約咗第二日 (2010.02.08) 去我屋企食。

太複雜我都唔識整，所以係 internet 找到豉椒炒蜆同蒜茸蜆肉意粉食譜，就整呢兩樣啦！

3kg 都唔少。

比較大隻嘅用嚟豉椒炒。

SIZE 細 D 嘅起肉整意粉。

1.5 kg 蜆都唔係好多肉。

烚好 D 蜆開始炒，其實生炒熟會比較好食，但咁多蜆比較難控制同一時間熟。

用另一個鑪整豉椒汁，整好燴入 D 蜆度，兜勻。

原鍋上枱，少洗一隻碟又保溫。

蒜茸蜆肉意粉

兩樣都係第一次整，但效果唔錯，大家傾吓講吓食吓飲吓兩個幾鐘，一樂也！

挖蜆記 (上)

2010-02-09T16:21:00.000-08:00

上星期日(2010.02.07)，同朋友去咗 Venus Bay 挖蜆，四個人努力咗四個鐘，挖咗大概 3KG，算唔錯，夠我地食一餐。

由墨爾本揸車去 Venus Bay 大概要兩個幾鐘，今次全程都係朋友 WING 揸車，在此先多謝佢！
嗰日天氣唔錯，唔會太熱或太凍，D 海水仲有 D 暖暖地。去之前要上 internet 申請吊魚牌，每位 AU$6，仲要先 check 潮汐時間表，要水退先得。

嗰海灘好深好大，而且唔係好多人。

行咗差不多一個鐘都唔覺有蜆 (有 D D 失望)，正想行返去飲嘢時，WC 發現一個疑似蜆洞，於是我用匙羹一"不"，BINGO... 有蜆呀!!! P.S. 用匙羹係因為呢度唔比用工具挖蜆，我估係近年太多人濫用自然資源，所以呢幾年規定要申請魚牌，唔俾用工具，同每人最多只可以挖 2kg，其實我覺得 1kg 都夠，唔通真係要去一次食足一星期咩！

原來唔駛好深，只要有蜆，大概係沙底 1-3 吋就會有蜆。

我地發覺 D 蜆係一堆堆咁生活，如果你發現第一隻，不仿試吓係附近挖吓，好大機會會有收穫。於是我地四個人就係嗰度開始挖啦！

挖挖吓開始多蜆，我地就開始篩選啦，將 D 細嘅埋返入 D 沙度，仲哂 D 水，希望佢地生存到啦！

自製透明容器

努力咁挖咗三個鐘之後...

我地四個人嘅收穫，我估大概有 3kg。

影低挖掘離岸位置，希望下次有用。

WC 同我 (ML) 留影

Wing 同 Lisa

後記: 雖然塗咗大陽油，但我後頸都有 D 哂傷; 一對腳唔知係咪好肉得滯，比 sandfly 咬到無忽好肉。

2010.01.30 @ Mornington

2010-02-03T23:05:00.001-08:00

A day trip with WC to Mornington.

So bad that we found out one of the beaches we passed by where can find lots of clams. May be next time....

A Relax Afternoon @ Mentone

2010-01-26T16:45:00.000-08:00

I haven't posted anything for a while, not because nothing special happens, just a little lazy and busy.

Last weekend, we went to Mentone for a walk, Mentone is about an hour relax drive from my home.

They are our only company, a family with 2 kids.

Last peek of the beautiful view!

Ginger Milk 薑汁撞奶

2009-12-28T03:56:00.000-08:00

Boxing Day Dinner 喺朋友屋企食飯，飯後一齊試整薑汁撞奶，朋友之前試過但唔係好成功，佢反覆咁係 YOUTUBE 睇咗好多唔同人整薑汁撞奶嘅片段，有 D 又話 70度，有 D 又話 70~80度，有 D 又話滾咗之後拉幾次。我地一齊試咗用唔同溫度，唔知係咪因為唔係用電子溫度計，好似無論我地點試，都無法子唔變 "薑奶"，最後試埋拉 10 次，點知真係得咗，都唔係咁難唶！

(As our friends cannot read chinese, I added in a english section for them)
We had our boxing day dinner @ our friend's home. After dinner, we tried to make "Ginger milk" together as our friends tried before without success, they had been watching different video clips from youtube, those clip creators tried different ways to make ginger milk. One of them said the milk have to be 70C; another one said the temperature should be something between 70~80; another another one said you need to pour the boiled milk between 2 pots for couple of times..... We tried together starting from using different temperature, so bad none of them success. We finally tried to pour the boiled milk between 2 pots for 10 times and........ amazingly, it worked, that was really not that hard!

琴日，我地自己又係屋企試吓，因為之前無好認真咁計份量，如果你想整，下面係 finalize 咗嘅份量。

Yesterday, we couldn't control ourselves but to try one more time, because we would like to get a more accurate measurement. If you would like to make, below is our finalized recipe.

<< For 1 rice bowl of ginger milk / 一飯碗份量>>
Full cream milky 全脂奶 200ml
Old ginger juice 老薑汁 1.5 tbsp
Sugar 糖 1.5 tbsp

<< How to make / 點整 >>
磨薑蓉 mash the old ginger

壓出薑汁 squash the mashed ginger to get the ginger juice

倒出薑汁於碗底 put the required ginger juice into the bowl

準備平底煲兩個，用其中一個煮已加糖嘅奶至大滾，來回 10 次將奶由其中一個煲倒至另外一個煲
you will need 2 pots, use one of them to boil the milk with sugar, once the milk is boiled, pour it between 2 pots for 10 times.

10 次之後，隨即將奶倒入有已攪拌薑汁之碗中
After the pouring exercise, pour the milk into the prepared bowl, remember to stir the ginger juice before pouring (but you need to make it quick)

等 5~10 分鐘，食得！
wait for 5~10 mins and it is ready to go!

香港依家係大冷天，不訪試下呢個甜品啦！

座頭市

2009-12-12T04:42:00.000-08:00

故事簡介 (from http://www.hkfilms.com/Films/2004/Zatoichi/Zatoichi.shtml)

這是十九世紀的日本，資本主義剛剛萌生。
這是個貪贓枉法的小鎮，武功高強就是一種正義。

座頭市(北野武飾)是一位失明的流浪漢。按摩師是他的職業，而賭博是他的事業。在平凡的外表下，他實情是個精通劍術，尤其以快如閃電的劍法聞名，敵人還未見其出鞘，已變為死人。為了逃避一群險惡之徒和武士高官的追殺，盲俠座頭市流浪到一個小鎮。在那裏，遇到一位武士服部源之助(淺野忠信飾)，他為了支付妻子藥費而為黑幫擔任保鑣；認識了一對雙親被殺的姐妹，她們為父母報仇而假扮藝妓，盲俠座頭市受其影響決定以暴制暴，用自己的過人劍術替她們報仇，一場血腥戰鬥在所難免……

未看之前，我對此片有小小期待，因為自己小時候有看過勝新太郎的版本，對於一個失明劍客到處以暴治暴的事跡，就故事來說，我比較喜歡新版，但對於影像的處理，我不太欣賞新版中採用的電腦特技，感覺很漫畫。

另外，新版浪費了淺野忠信，他好像就是其他片中的嘍囉一樣，穿插在電影中，然後莫名其妙的死去?!

個人評分: 6.5 / 10

遙控模型車初體驗

2009-12-06T05:42:00.000-08:00

琴日星期六 (2009.12.05)，WC 個朋友攪咗個遙控模型車活動，我地都有去睇吓，估唔到都幾有趣，佢朋友仲話諗住 2010 年攪比賽，希望到時我影相技術會好 D 啦，因為呢次我影 D 相唔係好掂，特別係 D 模型車郁緊時影個D真係唔見得人呀！

今次因為仲有其他事，所以我地未能參與全程，下次一定會睇哂。

咸旦要哂太陽

2009-12-06T04:06:00.000-08:00

11月頭我又醃咗咸旦，呢次用咗鴨旦(上次我用雞旦)，有朋友話到咗醃嘅後期，如果哂佢幾日，咁D咸旦會多D油，星期五我見D咸旦已經醃咗30日，所以拎咗去露台哂吓佢。

我今次想醃足40日同哂3日，因為上次26日雞旦雖然都有小小油，但個芯仲有D白，我想見到今次D咸旦黃全橙黃色，期待ing......

Sexpo 2009 @ Melbourne

2009-11-30T02:53:00.000-08:00

抱著 "人一世，物一世" 的心態，我們上星期六去了一趟 Sexpo。我影了不少相片，但為免被人標籤為成人BLOG，所以不便在此全部分享。

人山人海

脫衣 Poker

雜技表現 by Susie Q

內衣表演

Queenland Badboys

業餘脫衣舞比賽

Sexpo Show Girls

假得可以的催眠師

脫衣滑浪

場內有很多不同的產品出售，對於我們來說真的大開眼界。

樓下的房客 by 九把刀

2009-11-28T19:22:00.000-08:00

並不是我看的第一本九把刀小說，但我實在很喜歡這一本，雖然內容很變態。

第一本看的是 "愛情兩好三壞"，可能因為年紀不輕，無法代入書中的愛情，但文章可以說容易讀，我指由開始到完結都讀得順暢，雖然我現在已把內容忘記得七七八八。

上周，我在本地圖書館看到了這本 "樓下的房客"，隨手借了回來，初時以為是 "愛情兩好三壞" 般，誰知一看便無法停下來，一轉眼便將整本讀完，書中各人物鮮活的在我面前做盡一些千奇百怪的事，這不是愛情故事，事實上這書內容血腥，色情，陰暗，污穢不堪，但真真實實的反映人性。我怎至懷疑，如果在合適的情況下，有幾多人會想造出房東/客的行為，我的意思是... 大概會比想像的多很多吧！

富想像力不一定指只會朝光明的地方/事物，陰暗面可以想像的空間一樣可以廣闊。

薑蔥炒蝦

2009-11-21T03:03:00.000-08:00

最近比較忙，但見很久沒有煮蝦 (我家老爺好魚好蝦)，今天便買了半公斤澳洲藍尾蝦回來，作了一小碟薑蔥炒蝦。

<< 材料 >>
大藍尾蝦 1/2 公斤
薑 4大片
蔥絲適量
魚露 1 tsp
糖 1/2 tsp
老抽 1 tsp
煮酒小許

<< 煮法 >>
蝦清洗乾淨，去頭尾腳及腸，抹乾。
起油鑊，下薑片爆香，下蝦然後煎香兩面。
下煮酒，再炒數下。
下魚露，老抽和糖，然後下蔥絲，再炒數下，熄火，上蓋焗兩分鐘。

金石堂初體驗

2009-11-20T02:17:00.000-08:00

在 Mrs T 的我愛金石堂!!! 內見 BLOG 友在金石堂大買台版書，令我忍不住要到那裡逛逛... 結果一逛之下，我就買了八本書，雖然加上郵費，其實價錢談不上便宜，但能身在澳洲而買到台灣書，著實不能太計較。

一開始我只想買 "自慢" 這本書，"自慢" 的意思是 "絕活" (即係耍家咁解)，是一個在職場打拚多年的中年男人兩年前寫的一本書。選了這書後，便在站內走走，逛到手工製作類書目，又...

見到 Mrs T 買了這本書，我的情況和她差不多，家有電衣車但不常用，懶當然是其中一個原因，但技巧不濟亦是事實，好好參考一下吧！

我家和其他人一樣，總有大堆不會再穿的衣物，有些雖然不會再穿但好些是自己曾深深喜愛的，不如試著能否將它改頭換面吧！

手工皂，一直想自己試試造，但一直只想未造。

在某雜誌見過介紹剪紙吊飾，好奇之下...

之前在香港時，買了好一些平底水晶，不用的話，可惜可惜！

我愛弄一些不太費時的自家食品，最好還要顏色鮮艷，果醬是一個好選擇。

買這本書的原因是...... 一看而知，不用多說，折回澳元才 $2。

看罷這些書後，如果有空而又覺得當中有值得推薦的話，會再作個別詳細介紹。

弱水三千

2009-11-19T17:15:00.000-08:00

中文是方塊字，
我們由小學起，
每天使用，
從前並不覺得中文字特別美麗，
當然我會因為某些遇過的人或事，
進而對某些字/詞/句有著特別的感情，
最近從不同的新聞/消息/渠道，
感覺到大概在不久/我可見到的將來，
正體字會漸漸被取締，
不能說不覺得可惜的，
可惜的是我~
從未好好的欣賞，
從未好好的運用，
更從真正用心的要寫好我的字 (我字醜！)。

從前很喜歡 "執子之手，與子偕老"，
幾凡朋友給我喜帖，
如果用此句的話，
我的目光會比平常多留數分鐘。
這八個字，
字意清晰，影像鮮明，
我想唯一的缺點大概字意上比較女性化吧！
雖然我知道 "子" 字其實可作男或女。

最近偶然 "遇見" 另一個比較中性的句子，
"弱水三千，只取一瓢"
身邊的事物/人何止三千，
但吾只要你/妳，
你/妳就是吾眼中的那一瓢，
並且是水 ~ 我賴以為生的水。

Farmers Market @ Collingwood Children's Farm

2009-11-15T18:05:00.000-08:00

大門口

未進門已有擺賣水果，
可惜車厘子未是當造，再等一個月吧！

平時入場費要 $16，
但如果等每月第二個星期六的農夫市集，就付 $2 就可以。

農夫市集入口

社區農地一角

農夫市集一角

洋小孩累了，在洋爸爸腳下休息。

各類有機蔬果

露荀當造，我們都買了一些。

自家製的有機芝士，
可惜我們都不會欣賞。

自家製乾果蛋糕

市場另一角

蚯蚓飼養場，
幸好未見蟲影。

在場見到大概有十個方形大桶。

蚯蚓們的食物~廚餘

旁邊三隻黑豬的出品，
被太陽哂過後，
$3 一袋 10kg。

豬屋入面的豬公，
往後面還有兩隻母的。

為什麼我知道牠是公的，
各位觀眾，
很明顯吧！

母豬一號

母豬二號

母豬一號的尾巴

法國肉雞，
全場只有這種雞有名牌。

腳上有長毛，
WC 起初說是牠的腳踏上雞毛，
後來看清楚才知道是真的腳長毛。

是日甜品

2009-11-14T03:22:00.000-08:00

天氣熱，
沒有心情煮食，
但對於甜品，
大槪因為是用另一種心情的關係，
即使人已熱得奄奄一息，
但仍在購物時花點心思，
要簡單，
雪糕是不二之選，
光吃雪糕有點單調，
夏季是各類莓果盛產季節，
籃莓明目~但帶微微苦澀，
紅莓顏色鮮豔~但味酸，
加點黃糖製成籃紅莓糖漿，
拌雪糕，
吃時透心涼，
吃後眼明亮。

<< 材料 ~ 200ml 成品 >>
籃莓 300g
紅莓 300g
原糖 (raw sugar) 200g
鹽 1/4 tsp
檸檬汁 2 tbsp

<< 製法 >>
籃莓，紅莓，糖，鹽中火煮 20 分鐘，下檸檬汁，熜火放涼。
成品可放雪櫃存放，一個月內吃完。

生活其實可以好簡單!

2009-11-07T02:19:00.000-08:00

澳洲天氣開始轉熱，
不是一般的熱，
由上星期氣溫在十多度上下，到今天突然變成夏日炎炎的三十多度，
尤幸這裡是沙漠性氣候，天氣熱之餘並不潮濕，
只是人總是覺得喉嚨乾乾的，
不想吃固體食物。

天氣轉熱，
露台種的蔥長得亂如雜草，
本想剪下來炒飯作午餐，
但心念一轉，做個清粥小菜吧！
打開冰箱，有蛋有菜圃，
就來一個菜圃蛋配潮州粥。

菜圃蛋人人會做，
就不過是蛋汁加蔥花加菜圃粒加數滴魚露，
下油鑊煎香，三數分鐘就準備妥當。
吃時大口大口的喝粥，再細嚼菜圃蛋，
蛋香，菜圃甜，
不知不覺間，兩大碗粥就喝完。

生活其實可以好簡單！

西京汁炆豬軟骨

2009-11-05T13:56:00.000-08:00

因為睇咗 discuss 版友 RdRunner 嘅我的家常菜入面嘅銀鱈魚西京燒，上星期其實我係試過佢呢個食譜用嚟整三文魚 (因為買唔到銀鱈魚)，又因為我唔食三文魚 (太腥)，所以嗰白味噌汁只係用咗小半，為咗唔好哂同埋自己都有得食，我用咗淨返嗰D 白味噌汁嚟整豬軟骨，諗住整好可以用嚟配拉麵或者整豪華版嘅出前一丁，真係諗吓都開心！

<< 白味噌汁 >> By RdRunner (條link 喺上面)
味醂(mirin)半杯
白味噌1.5杯
砂糖3/4杯
sake 少許 (我屋企無sake，所以用咗紹興酒)

先製作miso glaze mix, 將味醂+sake 落pan開火煮熱﹐蒸發少少酒精﹐再落味噌煮開﹐收細火後落糖﹐慢慢煮勻後熄火攤凍至室溫。

<< 其他材料 >>
豬軟骨 1kg 切大塊
洋蔥 2 個切條
老抽適量
蒜蓉 2湯匙
胡椒粉適量
雞湯適量 (無就用水都ok)

<< 整法 >>
(1) 豬軟骨洗淨抹乾，加入白味噌汁&蒜蓉同醃過夜。
(2) 洋蔥切條。

(3) 起鑊下油，再放洋蔥爆炒直至聞到香味。跟手豬軟骨繼續爆炒直至見到表面微焦。

(4) 落雞湯 (或水) 到啱啱蓋過豬軟骨。

(5) 大滾之後，上蓋中火煮10 分鐘。
(6) 熄火，攤到凍，再開火煮至滾。
(7) 重複(6)，直至豬軟骨夠軟為止，通常 2~3 次就 ok，D 洋蔥會完全溶哂。

(8) 豬軟骨ok 之後，唔夠色就落老抽; 唔夠甜就落糖; 唔夠咸就落小小鹽。
(9) 唔怕油可以依家食; 怕油可以先攤凍放雪櫃，然後用匙不起面到 "京" 咗嘅油。
(9) 1 kg 豬軟骨煮出嚟唔會太多，但如果食唔哂可以逐塊連汁分小包放冰格，食時先解凍。

完成圖

好似無物人留言俾我，如果你睇過又鐘意的話，俾d 回應好嗎?

非誠勿擾

2009-11-03T13:46:00.000-08:00

係 local library 見到呢套戲，借咗返嚟，同 WC 喺上個 weekend 睇咗，我自己覺得唔錯，連 WC 呢個 "煲冬瓜" 唔係好得嘅都覺得 OK，呢幾日仲識用葛優係戲入面成日用嗰兩個字 "靠譜"。

我其實有小小怕睇國產片，唔係因為水準，其實香港有上映嘅國產片一般都有 D 水準，而係因為有好多出名國產片嘅提材都比較沉重，我明白佢地係反映緊某 D 真實面貌，但我控制唔到自己會因為睇完呢D 戲而有一陣難過。

套戲嘅內容其實唔算好特別，講葛優演嘅男主角秦奮係海外返嚟有 D 米四十幾歲又其貌不揚嘅中年男子，想正正經經成家立室，因為唔想浪費時間，所以就寫咗篇徵婚啟事，呢篇以「非誠勿擾」作結的徵婚啟事，吸引咗幾位唔同心事嘅女性前來，當中有墓地推銷員、性冷感師奶及珠胎暗結欲找便宜老豆嘅靚女等等，令秦奮啼笑皆非。喺其中一次約會中，秦奮遇上舒淇演嘅笑笑，可惜佢係一個苦戀緊方中信嘅的空中小姐。開頭秦奮俾笑笑嘅外外貌吸引，但由幾次巧合再遇，令秦奮見到笑笑嘅真性情，因而慢慢愛上笑笑，及後如何令笑笑投其懷抱。

故事其實唔算太特別，但某D 場口對白相當有趣味，成套戲所有場景都拍得好靚，當旅遊節目咁睇都可以。演員方面，葛優做得好輕鬆；可能係對白全國語嘅關係，連舒淇都做得好過喺佢之前大部份港產片，個人尤其鐘意戲入面表現笑笑食住秦奮嗰幾場戲。最後，套戲係 happy ending，睇完好輕鬆，作為一套愛情小品，呢套合格有餘。

十月份無 post 嘅相

2009-11-01T13:22:00.000-08:00

我地差不多每日都會煮飯，但唔會次次都影相，又就算影咗，都唔一定會 post 出嚟。對於我嚟講，佢地比較似攝影/煮食練習，有好多時，我影/煮得唔靚/好。我覺得靚嗰 D 就通常會比較有心機出 post。

我想之後不定期咁將 D 無 post 嘅相 show 出嚟，因為就算我覺得佢地影/煮得唔好，但我當時都有擺過心機落去，當做一個紀錄啦！

南乳雞翼，某日晚餐其中一味餸，由於個味有 D 怪怪地，所以...

青椒雲耳炒雞柳，呢個主要你用嚟比 WC (即係我家老爺) pack lunch，因為唔係樣樣餸都適合返叮，青椒算係其中一樣返叮之後都唔會太難食嘅菜類。

某日嘅晚餐，煎三文魚 & 肉鬆炒荷蘭豆，我自己對三文魚完全無興趣，因為實在太腥啦，所以配"肉鬆"炒荷蘭豆而唔係"清炒"，因為我淨食炒荷蘭豆，有小小肉碎吊味好 D。

炒烏冬，某周末嘅午餐，由於做法同之前炒上海麵近似，所以無專登 post 出嚟。

第一次整嘅咸旦食得啦！

2009-10-29T21:19:00.000-07:00

之前 (2009.10.04 自家醃咸旦 ) 整咗咸旦，本來應該等 30 日，但因為我認為雞蛋比較細隻，應該唔駛咁耐 (其實主要原因係因為琴日買到鴨蛋，想即刻再試用鴨蛋整嘅咸旦)，所以我就............

唔知點解，有 5 隻裂咗，我怕唔留得，所以我將佢地烚哂。依家烚完先覺自己笨，應該留返一隻用嚟打開，攪到之後我又要打開另外一隻生嘅嚟影相。

好彩仲有 7 隻完好無缺，沖乾淨之後，表面上除咗深色咗小小之外，佢地同醃之前 (26日前) 無大分別。

喺呢 7 隻入面我求其打開咗 1 隻，個黃就硬身咗，但唔算圓滑，色水都唔錯; 個白呢就好似普通咸旦咁 "情" 水狀; 聞落無咩味，我打算將其餘 6隻停乾之後放雪櫃，據了解應該可以擺得 3~6 個月，但我覺得好快會俾我地食哂！

到煮熟咗嘅咸旦，切開之後，真係有小小漏油架，不過色水差咗小小。先試個白，嗰質感同新鮮烚雞蛋白差唔多，係 only 咸咗好多，醃咸雞蛋的話，如果你唔想太咸，26日都可以架啦！到主角咸雞蛋黃啦，可能因為醃得唔太耐，佢係咸但唔會話入唔到口，嗰味同咸鴨蛋黃相差唔遠，有小小沙 feel，但佢唔會好似咸鴨蛋黃咁沙，如果你就咁送粥送飯，我覺得咸雞蛋都唔錯，至於用嚟整黃金餸，我依家仲未知，等我呢兩日試吓再分享。

我希望多 D 朋友自己整吓呢 D 手作嘢，其實唔難整，又可以控制原材料，咁咪食得放心囉！

新手試做 ~ 蝦仁炒蛋

2009-10-29T06:12:00.000-07:00

想試吓整蝦仁炒蛋好耐，但自己無物信心，澳洲比較難買到遊水蝦，就算係雪蝦，比較靚 D 嘅都唔平，失敗的話好似好浪費 D 材料咁。

咁點解我今晚又試整呢? 因為 "心動就不如行動"，試過如果差太遠咪死咗條心下次出去食囉！係自己屋企試，真係唔見得人都無人知！唔好以為我咁講又打呢篇嘢出嚟表示我呢次好成功，可能下面幅相見得人，但食落口唔係好似我食過嘅蝦仁炒蛋囉！要再研究吓先得，短期內唔會再試呢個餸啦！

<< 材料 >>
雞蛋 5隻
蝦仁 300g
乾蔥小許切碎
奶 3 tbsp
生抽 1/2 tbsp

<< 整法 >>
蝦仁開邊去腸，然後出水至轉色同蝦身卷起。

蛋分開蛋白同蛋黃，蛋黃加入生抽&奶撥打至均勻，蛋白隨意撥打幾下。

起鑊落小小油，先爆香乾蔥，再落已出水嘅蝦仁炒幾下。
蛋黃加入蛋白大力撥打幾下，落鑊再炒。(***唔知係咪我屋企爐頭唔夠火力，D 蛋落咗之後唔係即刻成塊，要等都幾耐吓***)

炒到見到蛋液就收乾就可以上碟。

嗰味就淡咗小小，口感就唔多似我食過嘅蝦仁炒蛋，D 蛋係覺得濕但唔多滑，如果再試的話 (就近都唔會啦)，希望會整好 D！

開嚟下火 ~ 皮蛋瘦肉粥

2009-10-29T05:30:00.000-07:00

上星期六，朝早十點零有事要出街，出發前唔想肚空空，所以之前嗰晚醃咗 D 咸瘦肉，今次屋企有皮蛋，可以整下火啦喂！整好咗我真係學 D 粥舖係廚房大嗌~~開嚟下火，我家老爺嗰陣仲未起身，佢聽到我喺度嗌以為我痴咗線！！！

<< 材料 >>
米 1 份就用 10 份水煲，建議你第一次先用呢個比例試吓稀杰，然後再自己調較合適比例。
米就要食之前一個鐘洗洗佢然後浸水。

猪肉要食前一晚用鹽醃。第二朝食前一個鐘，再用水沖一沖 D 咸肉 (作法係去緊 D 鹽)，然後出水 10 分鐘。

皮蛋我用咗3隻，因為我落咗杯半米，每半杯米我預1隻皮蛋。另外薑要幾片，因為我怕麻煩要逐片軌返上嚟，所以我係用一大舊切咗花嘅薑。

呢咸肉出水嘅時候，用另外一個煲，放水，煮至大滾，放入薑同浸咗嘅米同出咗水嘅咸肉，大火開蓋煮 20 分鐘，先拎起 D 咸肉，再中火煮 10 分鐘。

就係呢 10 分鐘，將咸肉拆絲，皮蛋切塊，夠 10 分鐘後，熄火，然後加入咸肉絲同皮蛋，"COME" 蓋焗 15 分鐘食得。因為肉本身有咸味，所以唔會好淡，如果想好味D，可以係食時落兩滴魚露。

Just need to believe "Love happens" ~ SIGNS

2009-10-26T14:11:00.000-07:00

有朋友係 facebook share 咗呢段片，睇完令我感動，如果你未睇過，不防哂小小時間睇吓！

SIGNS <--video link @ youtube.

條片有大概 12 分鐘，無時間睇的話，下面係我嘅九流 director cut！

Enjoys!!!

紅豆西米糕

2009-10-22T07:06:00.000-07:00

~補返之前嗰篇晚餐甜品嘅食譜

<< 材料 - 可做三份相入面嗰個 >>
紅豆 100g
西米 100g
片糖 2片 (最好用黑糖，會靚仔好多)
椰汁適量
椰糖水適量 (可落可唔落，落咗會香 D)

<< 做法 >>
(1) 紅豆浸水 6~8小時。
(2) 浸好紅豆再用小小水(剛蓋過紅豆小小)及加入糖煮至大滾，隨即熄火放涼。
(3) 放涼紅豆先攪拌，作用係等底面紅豆受火平均，再開火煮至小滾，隨即熄火放涼。
(4) 重複 (3) 至紅豆軟淋。注意係"小滾"，因為咁樣先可以保持紅豆原粒。
(5) 西米用大滾水開蓋煮 10~12 分鐘，再焗 20 分鐘。
(6) 煮好西米用水候水沖至唔痴，最後再用凍滾水過一次，然後倒入模。
(7) 西米雪凍會自然成糕狀，倒出淋上甜紅豆醬同椰汁 & 小量椰糖水 (optional)，即成。

其實個甜紅豆醬仲可以用嚟撈雪糕或者整紅豆冰，一樣咁好味！

2009.10.21 Dinner

2009-10-21T03:20:00.000-07:00

屋企落咗蟻藥之後，唔知係心理作用定係咩，感覺上好似少咗蟻蹤，由一日俾蟻咬幾次到今日淨係咬咗一次，情況好似得到控制，希望過多幾日就一次都唔會啦！

因為無咁多蟻咬我嘅關係，今日我比較有心機，所以整咗嗰甜品同我家老爺 share (因為我地都要控制體重，雖然從來都控制得唔好)，佢話味道唔錯，可惜嗰份量控制得唔好，整多咗好多西米，下次我量得好 D 再後加食譜啦！

先嚟今晚碟頭飯嘅相，係蕃茄燴雞絲飯。

再嚟生果，半隻 Rocky Melon。

甜品出場，紅豆西米糕。

食完好滿足！

單車初遊~St Kilda Beach

2009-10-18T07:10:00.000-07:00

新車落地，梗係要出街逛吓啦！雖然天氣唔算太好，比較陰，但好在唔大風。

先嚟兩架單車嘅靚仔相。

再嚟一 D 沿路見到比較特別嘅... 我地無影好多相，因為天色唔好，而且總會再嚟，下次先再影。

時間唔早，周公急 call，唔打咁多嘢啦！下次再會！

Encore - 鮮蝦喇沙

2009-10-17T08:45:00.000-07:00

我家老爺好鐘意食喇沙，久唔久就明示或暗示如果唔知想煮咩的話，佢"唔介意"再食多一次，其實整就無所謂，但喇沙都幾熱氣吓，老爺佢好易上火，不過我又真係有 D 懶諗整咩好，呢幾日掛住同屋企 D 不速之客 (蟻) 搏鬥，好啦！整就整，今次仲買埋蝦，味道會比上次好 (不過因為怕佢熱氣，我偷偷地落少咗一匙喇沙醬，希望佢唔覺啦！

除咗蝦之外，其餘材料同上次一樣，唔重複打啦，去呢度睇啦！魚湯喇沙

廢物利用~焗雞肶骨

2009-10-16T03:29:00.000-07:00

我估好多人都可能會知，喺外國買雞肉，同香港最大嘅分別係，呢度雞肶雞翼比雞胸平好多，所有有陣事我都會買雞肶返嚟起肉去皮，然後再用嚟煮餸。我起雞肶肉唔係好得，唔夠貼，都有考慮過要唔要買把起骨刀。你可能會問: 「咁唔可以買起咗骨嗰 D 雞肶肉咩? 」當然可以啦！係貴唶，依度普通雞肶賣 AU$2.99~4.99 1kg，起咗骨嗰 D 最平都要 AU$8.99 1kg，我呢 D C9 仔寧願自己起肉啦，最初嗰幾次，起完肉 D 雞骨我會掉咗，但正如我頭先所講-"我起雞肶肉唔係好得"，睇見仲有好多肉係條骨度，要諗諗可以點用咗佢...

我都試過唔同方法去處理 D 雞肶骨，試過用椒鹽整，味道唔錯但好麻煩好多功夫 (事前/後); 又試過用老水方法，功夫少 D ，味道又係唔錯，但之後 D 老水又要儲存; 之後俾我試到依家呢個整法，用焗，一來嗰軟骨 D 油會焗咗出嚟，二來焗完個雞肶骨會比較乾身，可以用手揸住食，唔會有汁滴到成手都係，三來味道梗係好啦！唔係我都懶得哂時間打呢篇嘢呀！

<< 材料 >>
雞肶骨 700g
老抽 2 tbsp
生抽 1 tbsp
叉燒醬 1 tbsp
糖 1 tbsp

<< 整法 >>
將所有材料撈埋一齊，用保鮮袋袋好 (因為雞肶骨大枝難撈到 D 調味料，用保鮮袋效果會比較好)，醃過夜。食前 1 個鐘，200 度預熱焗爐，將雞肶骨平均排喺焗架上。

200 度焗 20 分鐘，再轉 180 度焗 20 分鐘，OK 食得！配啤酒~~~~~~~正！

好用磨刀器

2009-10-14T15:13:00.000-07:00

唔計生果刀，我有三把刀，第一把係阿媽俾，喺街市買十零廿蚊嗰種；第二把係孖人牌中式切肉刀，即係唔係尖頭嗰隻，幾年前用 HK$4xx 喺吉之島買；第三把係 Kyocera 白瓷刀，大概兩年前用 HK$6xx 喺 Sogo 買。

我唔係介紹刀，呢方面我唔係專家，我想講嘅係我買白瓷刀時，我順便買埋同一個牌子嘅瓷石磨刀器，兩年前係HK$2xx。注意！佢喺用嚟磨鋼刀，唔可以用嚟磨瓷刀架！

我諗有用開鋼刀嘅都知，無論你把刀鋼水幾靚都好，用耐咗就梗係會無咁利，以我嘅準則，若果我把孖人牌喺生蕃茄底界十字時唔能夠輕鬆咁界開 D 蕃茄皮，咁把刀就要磨吓，而我就會用呢個磨刀器，只要係刀面沖一沖水，然後喺磨刀器嗰凹位由刀尖到刀底來回兩次，即得！完全唔需要考慮甚麼角度/力度。我知道孖人牌係有磨刀服務，我相信會磨得比呢個磨刀器好，但我得一把孖人牌，俾咗你去磨我又無得用，都係自己有個方便 D。我估依家有好多其他牌子都會有瓷石磨刀器賣，可能價錢會經濟 D，如果你用緊又覺得好嘅，不如又分享吓啦！

治蟻記之尋找他鄉的蟻藥

2009-10-14T14:14:00.000-07:00

呢幾日，無咩心機整嘢食，因為我不時係梳化俾蟻咬！

其實喺露台一路都有蟻，但因為佢地無影響我地生活，所以我無特別覺得需要去處理。我地屋企梳化嘅右手面係玻璃門，門出面就係露台，露台種咗幾盆植物，全部都係蔥嚟，因為呢度 D 蔥好貴吓，上網見到其他網友話蔥係可以自己種之後，就開始用係街賣嗰 D 蔥，用咗綠色嗰段，然後用白色嗰段插係泥度，咁佢就會自己繼續生架啦！你幾時要用，咪幾時剪囉！佢地好粗生吓，都唔明點解可以賣咁貴！唔知係咪因為 D 蟻係唔食蔥，而露台又無其他嘢俾佢地食，再加上聞到屋入面陣陣轉出嚟食物嘅香氣，D 蟻由自己係露台自己生活，慢慢就想辦法入屋嘞。

其實開始時我係唔知佢地入咗嚟，直到有一日我突然覺得個肚有一下痛，自己睇下咩事就發覺有隻蟻咬我，唔知係咪知道 D 食物都係我包好嘅關係? 正所謂 "斷人衣食有如殺人父母"，我咁諗係因為明明呀大老爺坐得近露台過我，因物事 D 蟻淨係咬我唔咬佢？！本來蟻咬就唔算好痛，但自第一次被咬之後，我就不時失驚無神咁被咬，嚴重影響心理質素，又無法子阻止佢地，我家老爺仲喺度嚇我話唔好用手整死佢地，唔係我隻手會沾咗 D 蟻味，其他蟻會跟住 D 味嚟咬我，唔係呀嗎？！咁我點算？！

於是我就開始係網上找治蟻嘅方法，嘩！五花八門，都唔知得唔得，唔係啦，都係回歸基本，先去超市睇吓有無蟻藥賣先！去到超市，見到有幾種蟻藥，有一隻仲有折，唔好理，就係你！返到屋企，我跟住說明書做，佢話要小小時間等藥力生效，希望佢真係 work 啦！我唔想再寫 "治蟻記之尋找他鄉的蟻藥二" 呀！

一 BLOG 兩址嘅煩惱

2009-10-12T14:49:00.000-07:00

我係一個 IT 人，工作上有好多 basic principles 要留意，其中一個就係 single source of information，即係資料係應該要儲存係單一嘅地方，因為管理上咁樣會比較有效率同埋無咁容易出錯，所以一開始係我開 blogspot 時，其實我係想將之後嘅 post 都擺係 blogspot，然後係呢度擺條 link 指返過去就算，咁樣先符合 single source of information 呢個原則。

話我係一個 IT 人比較籠統，再仔細分的話，我其實係一個俾 (provide) 資訊服務 IT Services 嘅人，唔好睇少 "Services" 呢個字，點解？因為有咗呢個字，我嘅考量就除咗一 D 純技術 (technical) 嘅問題外，最基本仲要加埋 "對使用者友善 (user friendly)" 呢個大原則。假設，我係一個唔覺意嚟到呢度 (yahoo blog)，但發現呢度所有 post 都係 link 去另外一個 BLOG，我可能會因為咁樣而唔再繼續睇落去; 又可能有 D 朋友只可以睇到 yahoo blog 而睇唔到 blogspot，咁樣咪唔係 "對使用者友善 (user friendly)" 囉！

我當然希望多 D 人睇我個 BLOG 啦！雖然 keep 兩個地址要用多咗時間，尤其好似啱啱咁，俾我發現有兩個 post 有錯字，本來只係要花 5 分鐘去改，而家用咗 10 分鐘，再加 30 分鐘去寫我嘅感想，我發覺我雖然明白點解我要將 D post 擺兩面，但我有 D D 唔明我自己 (係囉！整鬼我依家連呢 D 嘢都會有感想)！

周日自家 Brunch

2009-10-11T05:36:00.000-07:00

蝦仁肉片炒上海麵 + 蔥花咸瘦肉粥

星期日，如果朝早唔出街，就會係屋企整 brunch 食，其實我地日日都自己整早餐，不過星期一至五都係三文治，星期六通常都係出去買餸時係出面食個 brunch，如果星期日出街的話都係出面食，但通常星期日都唔會出去，多數都會留係屋企。

琴晚星期六整咗蝦仁肉片炒上海麵，剩低都唔少，仲有 D 琴日切肉片時剩返嘅肉頭肉尾，即係有陣時買咗猪肉返嚟，入面可能有 D 筋位同有 D 肥肥地嘅位，我比較喜歡將呢 D 位切咗出嚟。平時就盡量切得貼 D，因為切咗出嚟嗰 D 可能都唔要，琴晚因為都預計 D 上海麵會食唔哂，咁不如就整埋皮蛋咸瘦肉粥啦！咁我呢次切肉時去筋去肥唔駛好似平時咁貼，可以將 D 我覺得用嚟切肉片都好似會岩岩參參嗰 D 切埋出嚟。

蔥花咸瘦肉粥 (??? 點解變咗蔥花，因為我屋企 D 皮蛋咁啱食哂！)

<< 材料 - 5~6碗份量 >>
咸瘦肉 150g
幼鹽 2 湯匙
米 1/2 米量杯
蔥花少許

<< 整法 >>
皮蛋咸瘦肉粥其實真係好易整，先將切咗出嚟嘅肉頭肉尾 (唔好切碎住) 落鹽，放係碗入面包好放雪櫃下格醃過夜，就成咸肉。

第二朝食前一個鐘，先用水浸小半杯米。再用水沖一沖 D 咸肉 (作法係去緊 D 鹽)，然後出水 10 分鐘。

呢個時候，用另外一個煲，放 1.5~2 升水，煮至大滾，放入浸咗嘅米，大火煮 20 分鐘，再中火煮 10 分鐘。

係你等煲米嗰 30 分鐘入面好輕鬆咁剪/切碎 D 咸肉同蔥，點解要輕鬆，因為整緊 Sunday Brunch，唔係打緊仗，just relax....

上面中火煮 10 分鐘之後，熄火，加入碎咸肉同蔥，come 蓋焗 15 分鐘，食得。

配返蒸蝦仁肉片炒上海麵就啱啱好！

蒜蓉芝士焗蝦

2009-10-09T23:28:00.000-07:00

我家老爺好魚好蝦，逄 weekend 都會整是但一樣俾佢食，魚就煎多，如果要食清蒸，通常都係出去食，因為屋企個爐火力唔夠，而且我地唔係住華人區，屋企附近無活魚賣。整蝦就薑蔥炒多，無得解，習慣嚟！

今朝出去買餸，又買咗蝦，今次攪攪新意思，試吓蒜蓉芝士焗，洗連整大概要 40 分鐘，試過之後，我家老爺話味道都唔錯，如果聽日你有時間，你都試吓啦！

<< 材料 >>
大蝦 500g，洗乾淨，剪頭尾，再開邊去腸
蒜蓉適量，我係用之前整好放係雪櫃嘅獨子蒜蓉
黑椒適量，可落可唔落
芝士適量，我用咗 kraft 芝士兩片

<< 整法 >>
焗爐先預熱 200 度 15 分鐘。
係處理好嘅蝦上面先洒上小小黑椒。
再係蝦上面落小小蒜蓉同舖上小片芝士，平排放係焗盤上面，入焗爐。

再用 200 度焗 10~15 分鐘 (視乎你個焗爐嘅火力)，熄火再等 2~3 分鐘。

排好係碟，食得，都呃得吓人架！

網上買單車記之三

2009-10-09T07:34:00.000-07:00

咁究竟 Dahon 同 Yeah 有咩關係呢? 用咗小小時間係 internet 找答案，都有好多人同我有相同疑問，其中有一位網友仲去咗 Dahon 嗰 forum 問，Dahon 都有對呢個提問正式回覆，想睇原文嘅話可以去呢條 link "Is this like a real thing?"，內容大致意思係 Dahon 從來都有利用自己一 D 固有技術 (即係 outdated 嗰D) 怎至佢嗰廠都會幫其他公司做單車，所以你唔會係 Dahon 度見到呢D車(因為基本上唔同牌子)，如果你係外面買咗而又有問題的話，你要找賣嗰個同你攪，Dahon 係唔會負責，但佢 comments Yeah 係好單車，同埋有好多 Dahon parts 你都可以用。

佢咁講，我就放心好多，前一篇我都講過，我都係全新手，買車全睇 size (兩部加埋可以放係車尾箱)，外型同價錢，技術係咪最先進反而唔大 concern，如果平 D 買到差唔多型嘅 Yeah 其實都 OK，雖然係 ebay 拍賣嗰架係橙色，唔係我最 like 嘅 color。

攪咗咁耐，係上星期日 (10/4)落咗第一個 bid，我落嗰時已經去到 AU$8x，第二日星期一半夜就到期，當時我心目中希望用最多 AU$250 嚟投，加埋運費就 AU$300，試過 OK 的話就買多一部，由星期日到星期一晚飯時段，一路都有人同我一齊落 bid，我上一個價位，佢隔一陣又上一個價位，直到 9 點零鐘就去到差唔多 AU$150，因為睇唔到係咪同一個人，所以唔知係咪好多人定係得一個人同我搶部車，反正去到差唔多 10 點幾個價就去到 AU$24x，投標呢 D 嘢真係一種折磨，睇嚟 AU$250 係唔可能投到架車，咁我覺得好煩之際，我家老爺又催我去瞓，依家想返都覺好彩，點解? 之後你就知啦！咁我瞓之前就調高咗個 maximum bid 去 AU$300，因為自己心急想買架單車囉！！！點知唔調尤自可，一調就即刻俾人 overbid 咗，當時我就心生不忿 (又有D覺得會唔會係因為呢部係好嘢，所以先有人同我搶)，於是我又再提高到 AU$320，今次無俾人即時 overbid，我都無再等就去咗瞓，未瞓著之前其實有D後悔，一來自己其實唔算熟行情，二來其實同 model 仲有兩部俾人投緊 (不過要遲D到期)，三來其實明明係諗住最多用 AU$250，點解會俾自己落多咗 70 蚊架！

到咗第二日，果然最後俾人用 AU$325 投咗，都有小小唔開心，因為又要再嚟一次。呢次失敗咗，我係星期二又再留意其他 auctions，同一個 seller 有另一個投標係星期三 10pm 到期，今次我有小小唔想自己太上心，因為之前其實自己好緊張，不停咁 check 住同埋會逐小 update 個價，今次我係星期二完全無落 bid，到咗星期三大概 6pm，嗰時係 AU$8x 時落第一下同 maximum bid AU$150，跟住一路都無理，到咗 9:30 時個價去到 AU$135，由於費事好似之前咁你一下我一下咁，我將 maximum bid 改到 AU$180，之後立定主意唔再加，諗住唔得就算，去到最後 20 秒，個價去到 AU$165，跟住每幾秒郁一下，去到最後 10 秒時 AU$171，10-9-8 (172) -7-6-5- (173) (174) -4-3 (175)(176)(177)-2-1，結果我用 AU$177.1 投到，可能呢個價係香港可以買到一模一樣兩架，但嗰一刻我嘅快樂你唔會明，好彩有星期一晚 325 先生 (或小姐)，我希望你/妳一切順利，真心嘅！

周未節目

2009-10-09T01:31:00.000-07:00

今星期我家老爺又要 on call，無得出街，所以專登留意下今晚有咩電視節目，星期五晚，Better Home and Garden 就梗睇架啦！貪佢內容豐富得嚟夠輕鬆，都係講食講花園同埋一 D 手作仔，我成日都問我家老爺要幾時先可以識自製屋企 D 傢具，佢就梗係無理我啦！所以呢個節目對於我地嚟講係一個娛樂節目嚟。

我地好少睇本地製作節目，通常都係一 D Soap Drama，仲係死唔斷氣做咗幾十年都唔完。除咗呢 D，weekend 通常都係美國電影嘅天下，今晚 8:30 就做阿森一族大電影，10:30 係民族台就做日本戲 "惡女花魁"。兩套我都有興趣，我地都幾鐘意睇 SBS 民族台，政府台嚟，為咗配合多元文化，呢個台會播唔同地方嘅新聞 (包括香港) 同埋唔同地方嘅電影，通常佢播得都唔會太差，當然唔包你會鐘意，好多國際知名嘅電影 (我講緊係D電影節播嗰D) 我都係喺呢度睇，返而係香港時就無咩留意呢類型電影。唔講唔信有 D 戲睇完都會覺得唔錯，怎至會睇完之後再去 search 返多 D 套電影相關嘅資料，例如相關背景，導演，演員同埋其他相關作品，都算係有個機會幫自己開大小小個視野啦！

今晚睇完兩套戲，如果有觀後感的話，會再 post 上嚟同大家分享吓！

網上買單車記之二

2009-10-08T15:12:00.001-07:00

網上買單車記之一

其實未去 ebay 之前我都有心水單車牌子~Strida 同 Dahon，個人比較偏好 Strida 5.0，貪佢有型，但上網睇佢個 spec，有小小怕自己會唔夠高同埋架車無轉波，咁咪小小斜都好辛苦?

最最唔好嘅係呢隻車 melbourne 無專門店同唔多覺有街舖賣緊，除咗相之外就完全無其他方法可以親身試吓部車 (摸下都好)，全澳好似得一間專門店係 sydney，之前發過電郵俾專門店問吓 color 同 shipment 要幾錢 (架車就要 AU$11xx-12xx) 又唔覆我，我家老爺唔知我問架，因為真係幾貴，我諗住 check 哂價錢然後想一個方案出嚟睇吓如何可以係日常生活節省一下，希望佢俾我買，但因為由頭到尾專門店都無答過我，所以慢慢就無咁想賣 Strida 5.0。

唔係 Strida 5.0，就去咗 D 本地街舖睇 Dahon，D 街舖 sales 好有心機同我介紹唔同呢個牌子同埋佢唔同嘅 model，由佢地度最平嗰個 model AU$5xx 至最貴嗰個 model AU$28XX，之後我心目中就認定咗我心水 model ~ Curve D3，之後睇咗兩三間，要買我心水嗰隻平極都要 AU$66x，都係覺得比較貴，一定要 check 吓有無其他 options。

咁之後我就去咗 ebay.au search 啦，發覺係 ebay.com.au 係無本地 seller 賣 Dahon 車，ebay.au 入面得幾個其他國家(英美)嘅 sellers 有賣，天真嘅我以為呢 D 咁大件嘅貨如果從英美買個運費會好貴，所以當時我只係集中睇 Aussie sellers，本地 seller Dahon 就無賣，但有一隻 Yeah 牌就有，因為我係全新手，講真真係聽都未聽過呢個牌子，不過見佢賣嗰個 model 個 design 有 d 似 Dahon，睇落我都接受得到，咁就花咗小小時間睇吓佢個 product description，入面話佢係 DLT (Dahon Licenced Technology) 重 repeat 咗好多次又話呢架車個街價要 AU$56x (??? 個價咪拍得住 Dahon ???)，頭幾分鐘我都有 D 混淆咁佢即喺係唔係 Dahon 呀? 見到佢個 ebay "Buy it now" 價係 AU$4xx，加埋運費 AU$5x 都成 AU$5xx。不過佢有兩個拍賣，如果好彩可以低過 "Buy it now" 價都有 D 著數嘅，但係落 bid 之前一定要攪清楚 Yeah 同 Dahon 係咩關係！

網上買單車記之一

2009-10-07T14:52:00.000-07:00

由呢度天氣開始暖D就開始想買兩架單車，之前係香港其實都有兩部 cheap cheap (HK$4xx) 嘅單車，我同我家老爺一個星期都會有一至兩之出去單車徑走返轉，感覺良好，但部車其實都要幾用力先去得快，咁當然我地體能差同重磅係有好大關係啦，雖然之後兩部車俾咗大姑奶，用佢標準身形試過，佢都有相同感覺。

今次我嘅 target 係細架摺車，因為我地都鐘意自駕遊，如果兩部車可以一齊擺係車尾箱就 good fit！既然有呢個 idea，我地就開始去睇單車。嘩！好貴，貴價車貴就好合理，但一 D 睇落同我地係香港用嗰隻差唔多嘅都好貴呀！要記住，依家澳元係咁升，無理由 D 入口嘢仲咁貴架，唔得，我要上網 check 吓先。

Check 價錢通常我會係 ebay 開始，貪佢有新有舊，多 D references，發現一般比門市單車舖平 5~10% 到，我指係 "Buy it now" 價，即係唔駛你投，你可以直接同佢買就 OK，不過單價平 5~10%唶，但加埋運費好似唔差好遠，於是我又再睇下我心水有無得投標，希望可以博到最後投標價係平過直購價啦！

分享部份我廚房/雪櫃會有嘅嘢 - Part 2

2009-10-07T14:42:00.000-07:00

I didn't copy this post to here, please visit 分享部份我廚房/雪櫃會有嘅嘢 - Part 2 in my Yahoo Blog.

分享部份我廚房/雪櫃會有嘅嘢 - Part 1

2009-10-07T14:40:00.000-07:00

I didn't copy this post to here, please visit 分享部份我廚房/雪櫃會有嘅嘢 - Part 1 in my Yahoo Blog.

拍青瓜拌雲耳

2009-10-07T14:35:00.000-07:00

I didn't copy this post to here, please visit 拍青瓜拌雲耳 in my Yahoo Blog.

我唔係傻瓜機

2009-10-07T14:32:00.000-07:00

I didn't copy this post to here, please visit 我唔係傻瓜機 in my Yahoo Blog.

林金城 - 知食份子

2009-10-07T14:29:00.000-07:00

I didn't copy this post to here, please visit 林金城 - 知食份子 in my Yahoo Blog.

新搬嚟呢度，多多指教

2009-10-06T04:50:00.000-07:00

本來我係 yahoo blog 擺開 (其實都係個零月度)，但近日發覺有好多問題，死圖就最常見，又或者 upload 唔到相，想吓想吓，不如趁未係好多 post 時轉去第二度啦！之前有考慮過 sina，不過有 D blog 友話會有內容審查 (???!!!)，唔係掛? 咁不如試吓 blogspot 啦，反正我平日都用 gmail 多，希望一切順利！

呢個係我 yahoo blog 嘅地址 WC & ML 的生活空間，個版面好唔同架！

我之後會 post 係呢度，但擺返條 link 係 yahoo blog。

後記 (2009.10.08)，我改變咗主意，決定以後 D POST 會擺兩度，因為有人係我推薦嘅林金城 - 知食份子入面留言，原來真係有人會留意我嘅介紹，雖然只得一個人回應，但我都好開心！

自家醃咸蛋

2009-10-06T04:46:00.000-07:00

如果你依家住香港，呢篇你可以唔駛睇，因為你好容易又平咁買到咸蛋，但如果你住嗰度係無生咸蛋賣 (好似我咁) 又或者你想整 organic 咸蛋，咁你 may be 會想睇落去。我呢次唔係用 organic 蛋，我只係用 free range，即係隻雞唔係籠養，因為我相信有郁動嘅雞會比較健康。

呢次係我第一次整咸蛋，未知效果點，D 蛋係 10 月 31 日應該夠期，到時再 post D 相上嚟。

***後記: 26日後，製成品 (2009.10.30 第一次整嘅咸旦食得啦！)

<<材料>>
(1) 鹽 300g
(2) 水 900g
(3) 茶包 3 個
(4) 蛋 12 隻

我係用呢種玻璃罇，貪佢平同埋罇口同個身一樣咁大，容量係 1.6 lites，啱啱裝到 12 隻蛋連鹽水。

蛋洗淨停乾入罇。

鹽 + 水 + 茶包煮好，放涼，然後倒入已放蛋嘅罇，再將佢放陰涼地方 25~30 日。

第二次整冰皮月餅

2009-10-06T04:32:00.000-07:00

我家老爺好鐘意食冰皮月餅，最近周不時係我上網時哄吓哄吓借 D 意問我難唔難整，問得多我有 D 煩 (因為我唔太好冰皮) 咁就順吓佢意摷吓，發現原來除咗月餅模同埋開邊綠豆之外，屋企其實有齊哂其他材料，好啦！整就整。

上星期我整過一次 (可參考第一次試整冰皮月餅 )，個樣真係唔得，個皮又太厚，中秋嗰日再試，今次好 D，所以就記低材料同整法。呢個真係要推薦俾大家，因為個成本比起你買返嚟平好多。

<<材料>>
皮
(1) 熱水 100g + 糖 40g
(2) 澄麵 55g + 粘米粉 20g + 糯米粉 85g
(3) 鮮奶 180g + 生油 2 tbsp (我全用鮮奶，個味比用一半椰醬清 D)
(4) 糕粉少許 (可自製，用白鑊烘熟糯米粉)
餡
(1) 開邊綠豆 600g
(2) 糖 320g
(3) 油 80g
(4) 澄麵 160g

<<整法>>
開邊綠豆用水浸 6 個鐘。放浸好綠豆入煲，放水中火烚 (水要浸過綠豆面小小) 至綠豆面唔見水，熄火"COME" 篕焗 20 分鐘，再壓成蓉。

另一隻鑊燒熱下油，轉中火，倒入壓好豆蓉，再倒入糖，不停攪至糖溶。

再加入篩好澄麵，不停再攪至豆蓉成一團，備用。

至於皮，糖先用熱水開溶，將皮料(2)過篩加入鮮奶攪勻，再加入糖水及油攪勻，用大火蒸 25 分鐘，取出攤凍，再搓滑。

取適量皮於手中壓平 (我整得唔係幾好，你可以參考其他網友示範)，再放綠豆餡，然後將皮向中心搓，成球狀。

我整咗 6 小 1 大個月餅球。

因為之前唔知整得好唔好，所以無專登去買一個整月餅專用模，因為要成 AU$2x 一個，我要確定會再整先會買。所以今之用住 muffin 模先。

呢個係我用 AU$4.x 買嘅模，一句講完，唔好用！

將月餅團上小小糕粉，放入模，再壓實。

話個模唔好嘅原因係，條邊好 "arm 參"，好彩個褔字都 ok。

用 muffin 模嗰 D 就無法，個形係一定唔靚。

好彩切開之後，除咗嗰底之外，其他面嘅皮都唔算厚，嗰味道仲唔錯，我可以放心買個月餅模啦！

第一次試整冰皮月餅

2009-10-06T04:24:00.001-07:00

個樣唔係好得，又唔記得買糕粉，攪到要用油令佢唔痴，依家仲雪緊，等今晚雪硬D再切。

簡簡單單嘅晚餐

2009-10-06T04:21:00.001-07:00

每次懶起上嚟，我就會整呢個，洗連整 20 分鐘一定得，要洗嘅碗碟都係得幾件，煮時零技巧，最緊要都係我成日講嗰句，呃得下人嗰度好呀嗎！

<<材料>>
羅馬生菜適量
Caesar Dressing 適量，買現成就可以，但你可以自己整。
Porterhouse Steak 500g，有兩塊同個圖入面嗰塊咁大，你可以買其他部份。
海鹽適量
黑椒適量

<<做法>>
羅馬生菜洗淨，用手 "meet" 到啱 size，停乾水，備用。
塊 steak 洗一洗，然後印乾水。
燒熱個煎 pan (要好熱)，到小小油，放塊 steak 上去，每面煎 1-3 分鐘 (視乎係要幾熟)，中間唔好郁佢。
係煎第一面時，磨 D 海鹽同黑椒係生嗰面，如果你買嗰塊牛肉係靚的話，呢兩樣就好足夠，有紅酒不如留返嚟飲仲好啦。
差唔多煎好塊扒時，將羅馬生菜撈埋 D Caesar Dressing 上碟，然後上埋塊扒。

由洗菜開始計，20分鐘內一定完成倒。圖中見到嗰塊係七成熟 (我 preference)，每面我煎咗 2分鐘。

南瓜西米露

2009-10-06T04:17:00.001-07:00

如果你好似我咁，MA MA 地魚 (但我家老爺係猫精托世，好愛吃魚) 又唔鐘意食紅蘿蔔，但又想吸收胡蘿蔔素補補眼，除咗買丸仔啪之外，仲有咩辦法呢? 有，仲好簡單 TIM，煲呢個南瓜西米露啦，冷熱都好食，所費無幾，又只花你大概一個鐘時間。

準備好未，去片。

<<材料>>
南瓜一份去皮切粒
水兩份
西米 1/8 份
片糖適量
花奶適量 (食前先落)
栗米粒適量 (可落可不落)
椰汁適量 (可落可不落)

註: 我唔註明重量係等你可以自己用南瓜嗰份嚟預其他材料，想稀 D 就自行加 D 水。

南瓜要切成夏威夷果仁咁大粒，呢個 SIZE 係滾水中火煮大約半個鐘就OK架啦！(如果想加新鮮粟米粒，就依家落埋)

西米用另外一個煲，係水大滾時落 (要預多小小水)，開蓋中火煮 10 分鐘，然後熄火冚蓋焗 20 分鐘。跟住用水喉水沖至 D 西米唔痴為止。等到 D 南瓜煮好咗，就倒埋 D 沖好咗嘅西米入去 (如果係用罐裝粟米粒，就依家落埋)，再滾就可以加片糖，調好味就熄火。

食時可以加花奶，鐘意再香 D 就可以加椰汁，得閒整糖水氹下你身邊嗰個，包佢愛死你呀！

獨子蒜蓉

2009-10-06T04:12:00.001-07:00

好多人都覺得整嘢食好麻煩，又要揀又要買又要洗又要切又要煮到最後食完仲要洗多一次，我都有相同感覺，所以為咗方便自己，好多時都會想吓有咩辦法可以慳 D 時間，其中一個常用嘅就係預先整定一罇蒜蓉放係雪櫃下格，要用時就拎出嚟 "不" 就得，咁樣比起阿媽嗰代就每次用之前用菜刀拍下 D 蒜頭然後啄方便好多。次次啄，又要去衣又要洗好煩。可能好多人會話，呢 D 唔駛你講啦，但同其他朋友傾開，完來呢 D 好似人人都識嘅唔係人人識架，如果你已經整緊又覺得你個方法仲好 D，留言話俾我知可以嗎?

坊間有好多唔同整蒜蓉嘅方法，我試過三幾種，下面係我通常會用嘅方法。

首先如果有時揀的話，用獨子蒜會比較好 D，一來獨子蒜比較香，二來因為佢 D 皮厚同埋一粒一個，剥皮會快好多，價錢係貴小小，但值得嘅。

同 D 獨子蒜剥皮之後，要風乾幾個鐘，隔一晚就仲好。如果屋企有石盅，先用石盅中略為下佢 (無石盅就用菜刀拍碎)，因為咁樣會比較出味。其實如果唔怕費力，最理想係用石盅中到變成蓉，我上一次整係中到 D 獨子蒜成蓉，但之後手臂累得好緊要。

因為仲未係蓉，所以再用攪拌機打一陣。

打完可以入罇，記住唔好入滿，留返大概 10% 位左右。倒 D 欖油係面，或者其他油都得，作用最主要係隔住 D 空氣。

一個罇裝唔哂，分兩個罇裝，可以放一至兩個月都 OK，但用時記緊要用乾淨嘅工具 "不" D 蒜蓉出嚟。題外話，我同一般師奶一樣，好鐘意儲 D 罇罇罐罐，好唔鐘意依家 D 製造商好多都用膠罇/罐，希望唔會有一日所有罇/罐都用膠製啦！

芝士汁蘑菇煙肉意粉

2009-10-06T04:03:00.000-07:00

我家老爺好鐘意食白色汁嘅意粉，紅色汁嗰 D 唔鐘意，因為怕酸 (但唔知點解紅湯佢就 OK)，有時唔知整咩食好時，除咗煎扒之外，就會整芝士汁煙肉意粉，至於加 D 咩菜係入面就睇下雪櫃有 D 咩，有時係青紅椒，有時係西芹，有時係露荀，今次因為啱啱前兩日買咗蘑菇，所以用咗蘑菇。
我以前會煮麵撈嚟整白汁，但一來比較麻煩，二來煮麵撈要用好多牛油，嗰汁好漏下，所以最近呢幾次我都係整脫脂奶芝士汁，會比較清爽 (其實白汁又點夠紅汁清爽呀！不過大老爺唔喜好紅汁，無計！)
煮呢個意粉，洗切連煮大概半個鐘，飲紅酒的話，我估都 match 到，我地就配咗青檸梳打，貪佢酸酸地中和咗芝士嘅油膩。

朋友，得閒試試呀！
<< 材料 >>
7 號意粉 500g，即係最普通嗰隻，我用嗰隻上面寫要煮 11 分鐘，呢個份量可以兩個人食兩餐
大隻洋蔥一個，切粗絲
意大利煙肉 200g，切幼條，無就用普通煙肉
蘑菇 500g 切片，可以多 D 都唔怕
脫脂奶 200ml
Parmesan cheese 粉 100g，我用嗰隻講明用嚟整 pasta 嘅，pantalica 出，叫 italian style pasta topping，睇成份入面除咗 Parmesan cheese 外，就仲有 rice flour。我試過其他 Parmesan cheese 粉，但無呢一隻溶得咁好。

<< 點煮 >>
(1) 最好你有兩頭爐，一面 (A 爐) 就煮水，水滾先開用另外一邊爐 (B 爐) 燒熱另外一隻鑊/pan
(2) 落小小粗鹽同欖油係滾水度，再落意粉，如果意粉包裝上面話煮幾多分鐘，你就減兩分鐘啦！
(3) B 爐落油落洋蔥兜炒。
(4) 洋蔥轉色同有香味就落煙肉。
(5) 煙肉都香就落蘑菇兜炒 30 秒，然後 "COME" 蓋 2 分鐘，D 蘑菇會出頗多水，但唔緊要。
(6) 呢個時候，意粉應該煮得差唔多，就咁將意粉略為隔水然後由 A 爐倒到 B 爐，加脫脂奶，再煮多一陣直到奶滾即刻熄火。
(7) 倒芝士粉入 B 爐，不停兜直到見唔到芝士粉為止，如果見到 D 意粉比較乾或者鐘意多汁，可以加 D A 爐入面 D 煮意粉水，較好稀杰後可以試味加鹽或者加 D 黑椒。

完成上碟。

手工餃子

2009-10-06T04:00:00.001-07:00

如果有自己一家人包過北方餃子的話，我估大部份人都會覺得係一個唔錯嘅經驗。一家人分工合作，一個負責搓皮，一個負責切菜，一個負責壓皮，然後大家一路傾計，一路包餃子，講真食個 part 以經唔係最高潮。係我印象中我屋企食飯絕大部份時間係吵鬧或者批評中度過，通常都係由家父批評開始，唔係話咸就係話淡，唔係話色水差就係話唔夠味，總之印象中我從未聽過有任何一次由家父口中話過佢係滿意嗰餐飯；有時候家母又係幫唔落，其實上一輩嘅阿媽煮嘢都係咁，從來都唔記份量，但大部份其他人嘅阿媽就次次整出嚟都差唔多味，但家母就‧‧‧ 由於包餃子時通常都係家母負責 D 餡嘅調味，咁多年來我雖然食唔少合味嘅餃子，但唔合味嘅都佔唔少。

上星期六，我再次整咗餃子，因為我家老爺唔識整，所以由我一個人做哂，由搓皮，切餡，撈餡，調味，壓皮，包，我一個人負責哂，同家母唔一樣，我一早就係之前整嘅時候，試好同記錄低所需嘅調味份量，我只需要跟住落就 OK，但到煮好之後，我反而有小小懷念家母嗰種求求其其嘅調味，因為每次食第一粒餃子時就好似開六合彩咁，唔講你都未必信，開出嚟淡咗其實比啱啱味開心，因為好似挽救咗一個災難咁，當然如果係咸咗家父就開始新一輪嘅批評啦！

用咗差唔多兩個鐘，包咗大概 80 粒餃子，包得唔算好靚，但我家老爺都食得津津有味。

皮：麵粉 1kg + 水 500g + 幼鹽 1/2 teaspoon，搓到滑身，然後淨置半個鐘，再分成小粒，壓成薄圓形。其實買現成餃子都 OK。

餡：韮菜 500g + 碎豬肉 400g + 鮮蝦仁 (切粒) 300g + 生抽 6 tbsp + 老抽 1 tbsp + 糖 1/2 tbsp + 胡椒粉 little + 麻油 little，撈勻。

包法：自己食就總之唔好漏就 OK，你見到我包嗰 D 都係求其合埋，唔會明顯有摺。

煮：水滾落餃 (唔好落太多)，其間不停攪動，直到餃子浮面，再煮 3 分鐘即成。

食時鐘意點咩隨自己喜好，我就鐘意落甜醋。

食剩個 D 第二日可以用慢火煎香，另一種味道！

蜜汁蒜蓉雞翼

2009-10-06T03:56:00.000-07:00

1 kg 雞翼 + 2 tablespoon 蒜蓉 + 6 tablespoon 生抽 + 2 tablespoon 珠油 (杰老抽) + 2 tablespoon brown sugar (醃過夜)。如果唔用珠油，D 顏色無咁靚。

Preheat oven 120 度，先用 120 度焗 50 分鐘。掃上稀蜜糖，再用上面火 150 度焗 15-20 分鐘 (要自行睇火)。

自家燒腩肉

2009-10-06T03:41:00.000-07:00

久不久我地就會自己整燒腩肉，最大嘅推動力係塊皮，平時整完係唔會切 (今次因為要影相先至切一下)，然後成塊皮起出嚟食，D 肉去咗 D 肥油就會用撕成絲炒雪菜 (比用普通肉絲炒好食好多)。

其實係街食唔係唔好，又方便，但如果要人地免切起皮然後成塊食又好似好變態咁，咁唯有自己整，係屋企食就自在得多。

<< 材料 >>
盡量正方形腩肉 1 kg
紹興酒 1 tablespoon
醃猪料
---- 幼鹽 2 teaspoons
---- 糖 1 teaspoon
---- 胡椒粉少許
---- 沙薑粉 1/2 teaspoon
---- 五香粉 1/4 teaspoon (Optional)

<< 工具 >>
猪插 1
鋼勾 1-2
掃 1
鋼架 1 (要大過塊腩肉)
棉線

腩肉洗乾淨，用大滾水出水 15 分鐘，取出沖凍水直至腩肉凍為止，用 kitchen paper 抹乾 (叫得你用 kitchen paper，你就用啦，我試過唔用而試下停乾，但因為舊肉未全熟，一路停會一路出水。)，如果舊肉仲有毛或者四邊 "arm 參"，你可以依家處理。

係運動嘅時間啦! 你可以先播放強勁音樂，拎起支猪插，係咁插係舊腩肉 D 皮上面，初時你會覺得 D 皮啜住你支猪插，到你插得咁上下，你就會覺得唔啜，咁嗰個部份就 OK 架啦! 如是者插勻成塊豬皮。

運動完你要先掃酒 (皮加其他面都要)，等 5 分鐘。如果舊腩肉比較厚，你可以依家界幾刀，跟住掃將 D 醃猪料掃係舊腩肉度 (除咗皮之外)。

掃完醃猪料，你可以上鋼勾，我試過淨係用一隻鋼勾，唔係好 work，咁只會令本來就唔正方嘅腩肉更加唔正方，都係用兩個鋼勾比較好。勾好之後，吊起風乾，我試過 4-5 個鐘，又係唔係好 work，所以依家我會風乾一晚。

風乾之後，先用錫紙包四邊 (要四層，唔係唔夠力)，底就唔駛留邊，面就留至少吋半位，如果你買到舊腩肉好 "arm 參"，你可以用棉線圍住舊肉扎好。

舊腩肉包+扎好之後，放上鋼架，係腩肉面倒一吋粗鹽，再壓實。

由於每個焗爐火力不同，需要時間同溫度未必一樣，你要自行調整。
preheat 焗爐 230 度之後，放腩肉入焗爐，先焗 60 分鐘。60 分鐘之後，拆走錫紙，拎走/掃走粗鹽。

掃乾淨之後，180 度焗 40 分鐘。然後只用面火焗 20 分鐘 +/- (你要不時睇住)，直至你見到嗰皮開始硬同埋金黃色。

熄火，等凍小小就可以拎出嚟。

如果你有用鋼架同舊腩肉無包底，咁大部份嘅油都會留係個焗盤度。因為舊腩肉嘅厚度唔平均，我用咗隻匙去 "long" 高舊腩肉其中一面。

可以切啦! 切得唔靚，但好好味!!!

糯米排骨

2009-10-06T03:33:00.000-07:00

除咗不時會整菜肉雲吞放係冰格做存貨之外，我都會整糯米排骨，其實即係糯米雞，不過呢度 D 雞唔係好得，雪味太重，如果一定要去咗 D 雪味嘅話，個調味又要好重，試過之後發覺都係排骨好 D。
其實係有現成嘅糯米雞賣，不過大部份產地係中國大陸，唔係話唔放心，不過試過自己整，計下成本同埋所花嘅時間 (而且可以較到自己合味)，我又覺都值得用多呢 D 時間嘅，寫出嚟其實都唔知有無人會因為咁而試下整，如果有就梗係最好啦!

<< 材料 (16 隻份量) >>
糯米 1.5 kg (浸水 8 個鐘，隔水，
用油 1 tablespoon + 幼鹽 1/2 teaspoon "low 勻"，
然後蒸半個鐘 )
排骨 1 kg ( 生抽 4 tbsp + 老抽 2 tbsp + 糖 1 tbsp + 胡椒粉
醃起碼 2小時，最好過夜)
冬菇 16 隻 (浸軟，切條)
蝦米 80 隻
荷葉 10 塊 (出水備用, 1 開 2)
水或雞湯 1/2 至 1 杯 (視乎你鐘唔鐘意多汁)
生粉水適量

先處理餡料，起油鑊，爆香冬菇，再落排骨，中火兜炒 10 分鐘，加水或雞湯，大火煮滾 5 分鐘，然後收細火再煮 15 分鐘。之後試味，要比平時咸 D，再放生粉水令 D 汁變杰，要比平時杰 D，然後攤凍備用。

到包嗰時，荷葉用鮮色個面，先放一舊糯米壓平，再放冬菇排骨同埋蝦米，鐘意多汁可以再 "不" 多小小汁，然後再放一舊糯米係面。

包法同信封一樣，先將左右兩面合上，再將底個部份嘅荷葉覆向上，然後揸住舊糯米向上卷，如果塊荷葉穿嘅，你可以加多一塊係面。手鬆手緊隻大隻細唔緊要，因為所有嘢都係熟嘅，個人反而鐘意大小不一，咁食時如果肚餓咪揀大隻 D; 只係口痕想食嘢咪食細隻囉!

原本計劃包 16隻，結果包咗 17隻出嚟! 最後一個步驟，蒸多 15 分鐘就食得。17隻就預咗食唔哂，蒸好先灘凍，再用細保鮮袋包好，放係冰格雪藏，想食時蒸熱或叮熱都得。

啱啱蒸好就點忍得呀!!!

鮮蝦西洋菜雲吞

2009-10-06T03:23:00.000-07:00

食嘢嘅口味其實係一種習慣，如果你細個嗰陣食嗰樣嘢食得多，你就會鐘意食嗰樣嘢又或者係嗰種味道，有陣事你自己都未必為意，但你身邊嗰個就一定知，同一個人一齊耐咗，如果你有心氹佢開心，最簡單就由整或者買佢鐘意食嘅嘢開始，如果你鐘意佢，呢個過程已經係一個享受，到見佢食嗰一刻個滿足樣其實只係 bonus 嚟! 試下，無呃你嘅!

因為我家老爺比較鐘意有湯嘅食物，所以係冰格用嚟存倉嘅菜肉雲吞就每次食完都會包，只係差在用咩菜架唶。今期又要再包，見西洋菜仲唔錯，所以又再包多一次。

<<材料>>
西洋菜 500 g (渣乾水計。滾水-> 淖 5 秒-> 切細-> 渣水)
鮮蝦仁 200 g
碎猪肉 300 g

生抽 4 tablespoons
老抽 2 tablespoons
胡椒粉小許
麻油 1/2 tablespoon
糖 1/2 tablespoon

雲吞皮自行判斷 (因為個個人手勢唔一樣)，上面個份量我包咗 60 隻

將西洋菜+ 鮮蝦仁+ 碎猪肉+ 生抽+ 老抽+ 胡椒粉+ 麻油+ 糖倒埋一齊，順 (or 逆) 時針方向攪 (總知唔好轉方向)，直至見唔到肉塊。

即時食可以包元寶形或散尾形，我比較鐘意元寶形。三邊搽水，包法自己睇圖。

用嚟冰格存倉嘅包成枕頭形。三邊搽水，包法又係自己睇圖。

元寶形雲吞完成啦！滾水落 7 分鐘就食得，記得其間要攪下佢，唔係就會痴埋一舊。

枕頭形雲吞完成啦！上多小小生粉係面，擺鬆小小，先係冰格雪硬 1 小時，再入盒。

好易整 ~ 迷你蝴蝶酥

2009-10-06T03:13:00.000-07:00

有陣事想食 D 甜嘢，出去買又超唔方便 ﹝其實都係懶，因為身為妹仔嘅我成日都唔得閒。﹞，咁我就會想下整 D 簡單又呃得下人嘅嘢食 ﹝順便氹下我家老爺！﹞，最近由於之前買咗 D 酥皮整其他嘢有剩，咁咪用嚟蝴蝶酥囉！

我自己唔係整咗好多次蝴蝶酥，最大嘅感覺係唔係唔好食，但食完之後會有 D "漏"，因為其實主要材料之中牛油都比較多，所以上一次試下加 D 檸檬汁，估唔到效果幾好喎，所以今次再整就記錄低同大家分享。

希望你都試下，或者你家老爺/奶奶會鐘意。

<<材料>>
溶牛油 10g (可加可減)
Brown Sugar 1 tablespoon (可加可減)
檸檬汁 1 tablespoon
現成酥皮 1 塊 (你當然可以自製酥皮啦，呢樣我就唔係好耍家。)
牛油紙 2 張 (第一張要比酥皮大 1.5 吋位; 第二張根你家焗盤SIZE)

先係枱面舖一張牛油紙。
係冰格取出一塊酥皮，然後將酥皮無膠紙嗰面蓋係牛油紙上，呢個時候塊酥皮應該係凍而偏硬。

撕走酥皮上面嘅膠紙，然後先掃檸檬汁，再掃溶牛油，最後洒 Brown Sugar 再掃匀全塊酥皮。

呢個時候，塊酥皮應該會比較軟身，咁就開始摺啦！
(1) 第一摺由外向內摺一行 (大概為 1/6 個闊度)。

(2) 第二摺其實根住第一摺個闊度摺就 OK 架啦。

(3) 第三摺其實只係合埋兩邊。

將條摺好嘅酥皮用托底嗰張牛油紙放入冰格 5 分鐘。

夠 5 分鐘，等條酥皮硬身小小就可以拎出嚟切，每段大概係 1 cm 闊，如果想靚 D，頭尾可以切走小小唔要。

切完就擺做型，你可以唔屈個頂，但我都唔知整出嚟個形有沒分別。 (呢個時候你可以開始預熱焗爐 180 度)。排好哂所有蝴蝶酥 (記得中間要留返小小空位) 係焗盤，然後入焗爐 180度焗 8~10 分鐘 (其間自己不時睇住，同埋自己加減時間，因為個個焗爐火力唔同)。

反轉 150度焗 5 分鐘。

完成，都係嗰句 "呃得下人嘅" ！

我想整好多嘢, 但都唔及...

2009-10-06T03:10:00.000-07:00

想整到街食到嗰 D 甜豉油!!!

今日我又再試 (已試過一般大路整法，如生抽+老抽+糖) ，專登煎咗蝦米腸嚟迎接成功的一刻，點知原來係又一次失敗!!! 我已經參考其他網友嘅資料，用咗麥芽糖架啦?

我大概整咗 5,6 次啦! 又生抽, 又老抽, 又薑, 又 garlic, 又蔥, 又糖, 又係發問版見到 D 版友話用麥芽糖，但都唔係好似，唔通真係要落味精?!

Tell me WHY!

隔夜方包，掉咗又浪費

2009-10-06T02:07:00.000-07:00

咁不如整西多啦!!!

*"隔夜方包" 係題目嚟喳! 其實通常我唔係用隔一夜嘅方包，而係兩至三日嗰D，未變壞但就咁食又已經唔好食嗰D。

<<材料>>
蛋 2 隻
鮮奶 2 tablespoons
Raw Sugar 1/2 tablespoon
方包 3塊 (1 開 4)

做法如下圖:-

完成，加 D Maple syrup 楓樹糖漿，唔駛 15 分鐘就有得食。

义燒一字排

2009-10-06T02:00:00.000-07:00

自己好鐘意用义燒醬整嘢食, 尤其係一字排, 因為好鐘意咬嘢, 又貪有骨落地。
如果你或者你家老爺/奶奶好紅酒的話，呢個呃得下人 (我係唔好紅酒嘅，只係估下)。

<<材料>>
一字排 1.5kg
义燒醬 1/2 (大罇裝)
老抽 2 tablespoon
Brown Sugar 1 tablespoon
胡椒粉 little
稀蜜糖 1 tablespoon honey + 1 tablespoon boiled water

未醃之前，你要先洗乾淨一字排，然後抹乾佢 (呢個好重要，唔乾嘅話，落一罇义燒醬都唔會入味!)，再用醃料 (义燒醬+老抽+Brown Sugar+胡椒粉) 醃過夜 (其實兩晚仲好)，當然係放雪櫃下格啦。

食之前嘅 1.5個鐘，先預熱焗爐 150度 15 分鐘...

放已醃好嘅一字排排係鋼架之上。為咗之後好洗D，我係鋼架下面鋪咗錫紙。
焗完個鋼架其實好難洗下，但落咗嘅話，焗出嚟嘅一字排會乾身好多，D 油會留係個焗盤上，無咁油膩。排好一字排之後，入焗爐用150度焗30-40分鐘 (視乎你用嘅一字排有幾大件)。

係呢30-40分鐘之間，預備好用嚟掃上面嘅稀蜜糖。
我之前有試過係醃時就加蜜糖，但發覺焗時好容易燒焦，個蜜糖味亦唔出; 如果唔溝稀D蜜糖一樣都有呢個問題。
*題外話，我好怕燒烤蜜糖嗰支毛筆掃，又細支，又 luck 毛，掃一隻雞全翼要掃十幾下先掃得哂，但又掃得唔勻，真係唔知點解生產商唔改善下，攪到我次次去BBQ都比朋友借 D 意將我帶去支私家掃據為己有!!!

30-40分鐘之後，掃上稀蜜糖，要掃得薄D (因為掃嗰D係稀蜜糖，太多都係哂咗)，再轉 180度焗多 10 分鐘，根住反轉另外一面掃稀蜜糖，然後再焗多 15 分鐘直至你見到 D 肉收縮而露出D骨為止。
P.S. 如果你真係送紅酒，依家係時候開定等佢抖抖氣!

轉眼就焗好啦，都話呃得下人架啦!!!
唔係一定要食 steak 先開心嘅，我今晚同我家老爺一齊嘆骨飲可樂睇周星馳咪一樣咁好 feel!!!

比個 close-up 大家，見到 D 肉咁樣縮就係熟啦!

輕便晚餐+甜品

2009-10-06T01:56:00.000-07:00

12粒自家菜肉雲吞加小小韮菜

荔枝味蒟蒻+雜果

魚湯喇沙-用罐頭 Laksa paste

2009-10-06T01:38:00.000-07:00

唔駛太開心，唔係自己整喇沙 paste，係用罐頭laksa paste，不過呢隻係試過咁多隻係呢隻比較理想!!!

<<材料>>
一定要有嘅嘢:-2人份-米粉(2個)+油麵(250克), 椰奶 (milk, not cream), 淡奶, 芽菜, 豆卜, 魚湯(2人份-800ml), 喇沙胆 (laksa paste), 自家喜愛嘅丸。
唔一定要有嘅嘢 (但有咗會靚仔D):- 炸香咗嘅乾蔥, 螄蚶, 碎莞荽.......

Laksa paste 我用莊記, 我大概試過 10 種 8 種, 呢隻最合味! 不過唔知香港有無得賣, 我淨見過佢嘅雞飯醬, 都唔錯, 起碼呃得下人!

椰奶, 記住係 milk, 唔係 cream! 煮出來係兩件事!!!

自家製魚湯, 每個 weekend 都整一大玻璃盒, 方便淥麵淥雲吞 (又係自家製鮮蝦西洋菜雲吞, 一次整一大盒雪係雪櫃, 想幾時食都得, 下次整會影比大家睇)。

米粉先用水先浸軟。
豆卜剪開一半, 咁會比較入味。
芽菜剪去頭尾, 唔剪都OK, 不過無咁靚仔!

滾水下小小鹽, 放油麵。

水再滾, 取出油麵放入麵碗中。再放米粉入同一煲中。
睇下你用邊隻米粉, 煮到合你硬軟, 再取出米粉, 然後同油麵撈埋一齊。

再放芽菜入同一煲中。煮至你喜歡嘅程度, 然後放入麵碗中D麵上面, 但唔駛撈。
P.S. 芽菜其實可以生食。

另一個煲中, 煮滾魚湯, 加入你喜愛嘅丸, 再煮滾D湯。
加入 1/3 至半罐 laksa paste, 攪下佢等佢溶得好D。

再煮D湯至大滾, 先放豆卜, 再放 1/3 罐淡奶, 再放 1/2 罐椰奶, 或唔用淡奶用全罐椰奶, 立即熄火。
P.S. 如有螄蚶, 要係落淡奶之前落。

啦啦啦! 即刻似模似樣, 未倒入麵碗之前, 可以不起D紅油, 不過有就香D同靚D。
仲有試下味, 唔夠咸落D魚露或鹽調味。

自家製魚湯喇沙完成啦! 如果有炸香咗嘅乾蔥同碎莞荽, 可以依家加係面。得閒試下啦!!!

點解蔡生話佢係.......

2009-10-05T23:43:00.000-07:00

佢話呢度係 "尋完美的越南河歷程" 嘅終站─墨爾本勇記，我唔係想介紹你去食，而係用一個平民百姓嘅角度去理解吓點解佢係蔡生心目中最好，我未知呢句可唔可以代表埋我，因為我其實唔係食過咁多越南河，仲需要時間去找尋我心目中最完美。

先講勇記嘅外形，呢張相我轉登走到對面街影，從外面睇，其實佢同同一條街其他越南河店無大分別，都係有D舊舊地，但佢門口有貼到蔡生寫佢嗰篇文。

就係呢一篇啦！其實蔡生唔止寫過呢一篇，我印象中淨係喺壹周刊都講過三幾次，呢個位係留影熱點嚟，久不久就會見到有人企係呢篇文前面影相留念架啦！

除咗鹽同胡椒粉之外，仲有呢三樣調味係枱面，由左至右開始講，紅色蓋嗰個係類似潮州辣椒油之類嘅醬，都幾香，同埋唔算辣，我覺得用嚟點嘢食會比較合適，因為佢係油狀，如果落咗落去碗麵入面，會浪費咗嗰湯底﹔豉油就係普通生抽; 魚露應該係中價貨，因為個味唔係死咸，落咗湯之後個味幾鮮下，同埋我都食咗呢度起碼超過 10 次，未試過覺得好口渴，即係嗰湯同呢個魚露都係無 (又或者好少) 味精。

配湯河嘅香草 (金不換) 同芽菜，通常你一坐低，佢有理無理就會放低一碟，人多就會放低一大碟或者係兩碟，可能流量大，咁多次唔同時間嚟食，呢度 D 香草同芽菜都係咁新鮮，仲有一碟仔檸檬同辣椒，D 檸檬仲好細心咁切咗有核嘅部份﹔仲有，如果你食唔慣生芽菜，你只要同 D 侍應講聲，佢地就會幫你將 D 芽菜灼一灼佢，咁好似我呢 D 食唔慣嘅都食到。

我家老爺係叫中 SIZE 嘅牛腩肉+牛軟骨河，先講色，雖然嗰湯底係幾深色下，不過好清，比較似燉出嚟嗰 D 湯，你可以清楚咁見到入面嘅河粉，無咩油浮係面，係肉上面洒咗 D 蔥花，大細差唔多，有青有白，再上面有幾片洋蔥﹔到香啦，就咁聞其實唔算太香，有一陣淡淡嘅肉湯味，我未到可以聞得出用落咗咩嚟煲，但幾肯定唔會只係用牛肉同牛骨，因為自己都試過煲牛肉湯，煲出嚟會幾大陣味同埋會有 D 騷，唔知佢點樣煲到 D 湯咁清，如果佢俾我入去佢嗰廚房就好啦﹔到個味，個牛腩肉應該係一大舊咁煮好，然後切出一片片，唔係太濃味，你以為佢烚到無咩味咩，但慢慢趙下趙下，D 牛肉味就浮咗出嚟，同個湯一樣，個味唔算好搶。至於個河粉，其實我唔鐘意大滑嘅河粉，最怕就係 D 河粉薄得太緊要，一夾就斷，呢度就 OK。講完，點解我無講牛軟骨，因為真係無咩特別，咪軟骨咁味囉！

我嗰碗係細 SIZE 生牛河，除咗 SIZE 同牛肉，其他嘢同上面嗰碗一樣，同香港嘅生牛肉河唔同，呢度嘅生牛肉唔係一大片一大片咁，佢係大小不一嘅薄片，同埋係鸞埋一著，可能因為呢個係生嘅上碟，肉味比較濃，會比較食到牛味，但 D 牛肉份量唔係好多，係試真之前就比我食哂！！！

點解我唔叫大碗 D，因為我想食多樣嘢囉！春卷其實呢度間間牛河舖都有，只要佢係整幼身嘅都係唔錯架啦！

呢餐食咗 $25.x (HK$16x)，喺澳洲算係一般價錢，如果你嚟到 Melbourne，不防試下啦！

Melbourne Tram in Watercolor

2009-10-05T23:00:00.000-07:00

我好鐘意水彩，但唔係所有種類都鐘意，由於完全係門外漢，所以唔知道其實我鐘意嘅其實係咩派別，唯有用圖片解釋。就係下面呢一種，好似一撻撻咁，最鐘意係用呢種手法嚟表達街道同埋運輸工具，仲要有光影部份，好似右面呢一幅，喺條斜路上有 D 大廈嘅影就合我心意。

因為鍾意，所以有一期曾經幻想過自己可唔可以畫到，甚至開始買咗 D 幾靚嘅水彩連畫具 (三十幾支 Windsor & Newton Artist Grade, 呢度唔講價錢，我諗夠兩個人去食一餐正宗日式鐵板燒) 同埋去留意一D水彩班嘅資料，諗住慢慢學，希望自己老之前畫到啦！最後點？梗係有各種理由無學到啦！但久不久我都會打開盒水彩聞下摸下，幻想一下有朝一日我係街邊寫生個樣。

最近因為開始咗寫 BLOG，因而開始影多咗相，又因此開始去用一 D photo editor 嘅 software，就係咁，俾我發現咗原來有個新功能用嚟將 D 相水彩畫化 (可能已經有咗好耐！！！)，我唔識形容我第一次見到個成果嗰種開心法 (當然同時發覺早知我應該同我家老爺食餐鐵板燒！)，於是我就用咗我影嘅一幅相整咗呢個 BLOG 嘅 wallpaper。
頭先我講過，我最鐘意嘅水彩畫題材係街道同埋運輸工具，最近睇新聞，原來 Melbourne Tram 78/79 route 依家用緊嗰隻舊款車 (即係上面圖中嗰款，不過上面嗰架唔係行 78/79，佢係 City Cycle route) 會係大概兩個月後就被淘汰，於是我就想幫 78/79 影下相啦！不過計劃咗差唔多三星期，天氣都係未如理想，唔係天暗就係落雨。由於我唔想再等，我就係網上 download 咗 D Melbourne Tram 舊款車嘅相，然後再水彩畫化，希望有其他人好似我一樣，都鐘意呢 D 水彩畫化咗嘅相啦！
呢款先至係 78/79 route 用緊嘅車，外面係唔同顏色架！

講靚其實紅色搶眼 D，加埋街道 D 建築物做背景就‧‧‧‧‧‧‧ 點形容好呢？唔‧‧‧好似一 D 好唔真實嘅真實物件咁。

據了解呢款車由 1920 年就開始用，車廂入面 D 嘢可能用咗 80 幾年，但仲 keep 得唔錯，不過好似話成日壞，影響服務 (我都試過有一次坐坐下架車壞咗，要行咗 40 分鐘先到 Richmond)，所以先至要換哂 78/79 D 舊款車，之後要坐就淨返 City Cycle route。

車廂入面 D 座位就係皮製，有時坐落去會支支響。呢款車無分車頭車尾，到咗總站之後個司機就會由當時車頭駕駛室走出嚟去對面駕駛室，到時間囉咪開車，開車時同香港 "叮叮" 一樣，會拉下叮叮，都幾有趣架！

I copied the original images from Yahoo images and then edited them, as I forgot to record down the photo information, if so happen these photos are yours and you would like me to remove it, please drop a message to me.

Veg Out Garden @ St Kilda

2009-10-05T22:42:00.000-07:00

今日趁無落雨 (已經三個多星期都未試過全日好天) 仲有時有些小陽光，我地去咗 St Kilda Beach 嘅 Veg Out Garden 行下，其實本來係想去 Farmer Market，不過原來係上星期六，唯有等下次啦!

Veg Out Garden 係開放俾住係 St Kilda 嘅公眾用嚟種嘢，據了解如果你家住 appartment (所以無地方種嘢)，你就可以用好少錢同 Veg Out Garden 租一塊細細地嘅地嚟種嘢，唔限你種咩，或者唔種嘢用嚟養雞都可以，因為我真係見到有間雞屋係入面。

因為 Melbourne 依家極其乾旱，係 Stage 3 限水，所以呢度 D 租戶係唔可以日日淋水，淨係可以係星期二同星期六早上 6-8am 先可以。我發覺呢度來來去去都係種嗰幾樣，我估可能係呢幾種比較耐旱。

除咗 D 食得嘅菜，仲俾我見到一間雞屋，D 雞好大隻，我估佢地唔係肉食雞，佢地應該係用嚟生蛋巳，因為好似唔覺有雞公係度。

除咗菜同雞，好多人都會係度種花，雖然種類唔算多，但如果你慢慢睇下，你會發現原來普通花開起上嚟都幾靚。

喺呢個 garden，大大話話都有幾十塊由唔同人打理嘅地，有 D 會放咗一 D 自制嘅裝飾品，有 D 仲會放一個自製郵箱，我係有雀仔係上面嗰個郵箱研究咗一陣，係咪真雀呢?

伊沙貝拉

2009-10-05T21:41:00.001-07:00

上星期就做韓片原罪犯，今星期就做港片伊沙貝拉，兩套戲講嘅嘢完全唔同，除咗大家個故仔都有 D 涉及小小亂倫呢個題目。

雖然原罪犯係喺最後先俾觀眾知道原來吳大秀同美道係兩父女，但我記得第一次睇時，當做到佢地發生關係時，我硬係覺得有 D 唔妥，到後來諗返 (我當然唔係咁醒目當時就估到佢地係父女)，覺得唔妥嘅係我當時以為美道係一個好開放嘅女仔，因為美道其實一開始就想同吳大秀上床，但戲入面嘅吳大秀又唔靚仔又唔覺有咩特別嘅魅力，無理由一個青春少艾三唔識七只係識咗幾個鐘就帶人返屋企，怎至當吳大秀想夾硬嚟時，美道拒絕之後仲要好內疚咁講要有 D 心理準備先至同佢上床 (咁講即係話係遲早會啦！)。到後來佢地真係發生關係時，原來美道仲係處女，咁即係佢唔會係好開放嘅人，呢度就解釋唔到佢對吳大秀個種莫名其妙嘅好同為何無情情會愛上佢嘅心理，就因為呢件事太吊詭，所以套戲越睇就越覺得不安。

到睇伊沙貝拉時，套戲開始無耐就交待馬振成同阿欣上咗床同埋係兩父女，我反而無個種不安嘅感覺，唔係我覺得亂倫無問題，而係我知道如果係香港戲院上得嘅戲，根本無人夠膽咁正面講呢 D 題材，如果一開始就講得咁白嘅就一定唔會係真亂倫，到最後一定會出嚟交待只係一個誤會。有陣事都覺得香港嘅電影人同想睇香港電影嘅人其實都幾慘，拍嚟拍去 / 睇嚟睇去都係嗰 D 題材，D 敏感 DD 嘅就無人敢拍，唔係上唔到大陸就係有本地超級衛道之士呱呱嘈，唔通係一個完全隔絕一切聲色犬馬資訊嘅環境係真係對社會係絕對好事？

講返伊沙貝拉，我對個故仔無特別大嘅感覺，對於拍攝手法嗰方面，我完全係外行，只可以講拍得都算幾靚；戲入面嘅演員，我知道梁洛施小姐好似憑呢套戲得咗某影展嘅影后，無可否認佢係做得唔錯，但我更喜歡杜汶澤先生演繹嘅司警馬振成，佬味十足，見得到馬振成呢個麻甩佬係 "遇返個女" 前後嘅轉變，眼神，表情，講對白同肢體動作都交足戲，比起杜汶澤先生之前其他戲入面嘅角色有發揮得多，睇戲唔一定要睇靚仔靚女，反而多 D 呢種 "你我他" 嘅角色咪仲會令人投入 D。

原罪犯 Oldboy

2009-10-05T21:37:00.001-07:00

上個星期五，local 電視台重播韓國片 "原罪犯 Oldboy"，如果未睇過呢部戲，建議大家可以去租或者買返嚟睇，佢係一部好戲但你睇完唔一定會覺得好舒服。

呢次係我地第二次睇呢部戲，仲記得第一次睇完之後嘅震撼，當然好大部份係因為內容涉及亂倫同埋當中超血腥嘅場面，尤其是男主角吳大秀開咗最後嗰個禮物箱，而知道 "點解" 之後，自己割咗自己條脷嗰一幕 (嚟求第二男主角李宇真放過女兒美道)。

其實嗰次一路睇一路覺得唔係好妥，表面上吳大秀最慘係被人困起 15 年，老婆被人謀殺又嫁禍被自己，完全唔知 "點解"，放咗出嚟之後，就一步一步咁走向真相，中間遇到困難就殺殺殺，到最後真相大白時，以為一切苦難都快過去，但原來最後先至係至慘嘅時候，如果重頭再揀，可能吳大秀一早放棄要知 "點解" 係最好嘅結局，雖然呢個根本就唔可以，因為係 15 年被困嘅日子，一路支持住佢嘅就係 "點解" 同埋要報仇。
第一次睇，我比較代入吳大秀呢個角色，講真有邊個人可以肯定自己唔會好似吳大秀一樣，見到同學係學校依依泣泣而唔去講俾其他人知，一個人好難免會做/講咗一 D 自己覺得無傷大雅嘅事，真係鬼知會攪到咁大鑊咩！當時我自己都有諗我會唔會都犯咗一 D 無可挽回嘅錯，有人等緊要向我報復呢? 好可能我真係得罪咗人都唔知。另一個令我想咗一陣嘅係個結局，就算真係可以用催眠抺走美道係吳大秀女兒呢個真相，吳大秀都唔應該再同美道一齊，可以一開始用催眠令佢地相愛，就應該可以用催眠令佢地分開，吳大秀呢個知情者係清醒嘅情況下再造機會同自己嗰女一齊呢個做法令我覺得好唔舒服。

第二次睇，我比較代入李宇真呢個角色，先唔好討論李宇真同佢家姊亂倫呢樣嘢，如果你真心愛一個人，而佢原全因為你的愛而死，你又無勇氣隨佢去死，咁會係點樣嘅感覺呢? 我願意相信李宇真唔係一開始 (佢家姊死之後) 就想向吳大秀報復，無奈佢想死又唔敢死，又無法放低呢件事又或者去愛其他人，如果唔用向吳大秀報復嚟分散佢嘅痛苦，佢根本無法支持落去 (所以最後完成吳大秀報復之後，佢就立即自殺！)，如果話比可憐，可能佢比吳大秀更可憐。

如果可以完全冷血，根本就唔需要自責; 如果真係可以完全將責任推向其他人，佢可以到最後唔放過吳大秀同美道; 如果可以從過去走出嚟，佢最後唔駛死; 由佢家姊死嗰刻開始，佢就註定要生不如死，並因為佢由頭到尾都清楚事實嘅真相，一路都以為向吳大秀報復係一種解脫，但其實佢嘅自責從來都係對佢自己。愛上一個你唔應該愛上嘅人，不幸咁佢都愛你，兩人無法自制，到後來佢為你而死，你痛苦但無嘢可以做，又無得解脫，你嘅人生除咗精心設計報復其他人之外，仲有咩可以做呢！！！

無物得揀

2009-10-05T21:36:00.001-07:00

係澳洲，如果你係鐘意食零食的話，你會比較失望，唔計貴唔貴呢樣，選擇真係唔多，一般可以買到嘅，都係 D 薯片，餅乾，朱古力，乾果，果仁之類，食得多會幾悶，呢個係其中一個原因我會得閒整吓 D 唔同嘢嚟食，起碼填補吓缺少唔同類型零食嘅空虛。

我唔係傻瓜機

2009-10-05T21:32:00.001-07:00

我係年幾前買咗部 Canon 450D 俾自己，跟住一路都擺埋一邊 (大概一年到) 無咩理佢，到最近三兩個月又拎返出嚟用，呢個 BLOG 所有相都係用佢嚟影，如果你覺得都有 D 影得唔錯，咁其實都唔係太關部機事，因為我當佢係傻瓜機咁用，差唔多係全用 auto 嚟影，其實係我嘅後期製作技術越嚟越成熟唶！

用 auto 就無咩唔好，不過有好多可以控制嘅我就無控制到，例如我控制唔到用邊點嚟對焦，如果你睇真 D 相，大部分都係正正經經咁將件嘢 position 係正中央，影得多就有 D 悶，有好多又唔夠光，有 D 又太光，有 D 又太黃，唔好提咩景深/淺住，呢樣嘢完全係我知識範圍以外，好彩有後期製作，如果唔係睇怕呢個只會係一個 plain text BLOG。

昨晚，小女子終於又抄返本七日學曉 450D 手冊出嚟，我決定要認真學吓 D functions，最重要係會嘗試多 D 用吓，因為我成日唔記得 D 掣點用，希望之後影嘅相會有進步啦！

Hail Shower

2009-10-05T21:27:00.000-07:00

澳洲經常都會落雹，so far 我都見過幾次，上星期六我去 Chapel 時又俾我遇到一次，唔係好大粒，同埋只係維持咗大概 10 分鐘，好彩呢之我有相機係手。見到地上面一粒粒白色嗰D就係啦！

唔通個天都唔鐘意我?

2009-10-05T21:19:00.000-07:00

又落雨？！我究竟幾時先可以去影 78/79 tram 呀？

不過如果唔係有嘢想影，我都唔介意落雨嘅，不過就比較鐘意傾盆大雨，就好似依家咁。落完大雨之後嗰小小時間 (大概 10 分鐘到) D 空氣清新好多，如果細心 D，你會聞到草青味，我估計係因為周圍有 D 草俾大雨打斷咗；而 D 風會比平日濕 D；仲有就係無咗雀仔叫，佢地仲未咁快出嚟！
朋友，下次大雨過後，你不妨試下 take 個 break，感覺下呢 10 分鐘！

時間令一個謊言彷彿是無限大

2009-10-05T21:14:00.000-07:00

我可以見到朱小姐的苦，其忍耐力令我佩服得五體投地; 我也可以明白劉先生的苦，畢竟要守一個二十多年的謊本身就是一種懲罰，不管為的是什麼理由。

作為不認識劉先生的人，其實我並沒有資格說些什麼，只是大概劉先生真的不可能當特首了 (我承認，看罷金雞之後，自己曾幻想過由劉先生當特首也未嘗不可，反正各方民生政策自有各方專業人氏出謀獻策)，我想之所以有人反應激烈全是因為劉先生在很多人心目中不是一個好人，而是一個超級好人的人板，自己不能做到的，就側線投射在劉先生身上。

基本上，我是很佩服劉先生的，試想想要你守一個二十年的謊，未做大概已被可以想像的壓力唬住，開始做大概做不了多久就要放棄，一路下來能夠泰然面對你需要面對的沒幾人。
至於誠信，當然不能說沒有影響，但我比較在意他以後的電影作品 (我比較少聽劉先生的歌)，如是好戲，自當繼續捧場。

正如我一開始就說，要守一個二十多年的謊本身就是一種懲罰，希望事件早日告一段落，我樂於看見報章上劉先生劉太太在陽光底下樂也融融的相片。

[1] 點解會有呢個 BLOG

2009-10-05T20:33:00.000-07:00

係好多人心目中，我同 WC 都係怪人，我地外表平凡，生活平淡，我地鐘意嘅其他人未必鐘意；一般人好嗰 D，我地好似幾經努力，都唔係咁熱衷，我地就係喺我地自己嘅生活空間裡面用自己嘅方式生活。

暫時我個 BLOG 寫得最多嘅係煮嘢食，其實我唔算鐘意煮，只係年紀大咗，一次又一次係出面 D 食店失望而回，個人就開始懷疑，真係有咁難？我好好奇嗰過程﹝如何去整﹞，同埋如果呢個整法﹝抄返嚟嘅食譜﹞如果唔啱我，咁我要改 D 咩先得呢？咁我如果知道咗，就唔駛下下食一 D 我覺得唔啱我口味嘅嘢。

通常同一種食物我會去一 D 比較出名嘅試下，如果合食又價錢合理，我就唔會考慮自己整，但如果唔合味或好貴或食店好隔涉或我地有 D 好特別嘅要求，咁我就會試下自己整。

最初我係 internet 抄食譜，跟住試同改，我試完改完又合味之後，就會抄係筆記簿，再下次再整其實我只係會跟住筆記簿照整，所以 D 人係呢度見到嘅其實係我試過 (佢試食過 ) N 次嘅成果，我絕對唔保證你會鐘意食，因為一開始呢個 (啱唔啱其他人) 就唔係我最大 concern。嗰 BLOG 入面講食嗰 D 只係我筆記簿入面資料嘅圖文並照版。之前無寫 BLOG 係因為我中文打字極慢，而且我習慣咗用筆記簿，最近我本筆記簿就嚟用完，一來又要選一本啱心水嘅筆記簿唔係咁易，二來 technically 用 BLOG 記低係會比較 last 得耐 D。

我比較有興趣嘅其實係電影同睇書，攝影暫時只係我用嚟記錄嘅工具，唔稱得上有好大興趣，加上係完全新手，要花多 D 時間先可以再講。講返電影，我最鐘意 Zombie 同 Vampire 類，唔知點解，反正有做就會去睇，同埋內心深處係相信呢個世界係有呢兩樣嘢，其他類型嘅電影，有就會睇，好出名 / 好經典 / 好票房都會睇，比較鐘意係屋企睇，貪有 D 細節 miss 咗可以即時睇返，同埋如果某個 point 有嘢想問 / 講可以停一停，等一等。至於睇書，基本上咩書都睇，可惜因為英文唔好，睇得太慢，我相信我已經錯過咗好多好書，我其實都鐘意儲書，但從來唔敢隨心所欲咁買，因為咁耐都未試過住係自己物業入面，唔係無買過，只係有某 D 原因無住到，其實身邊有 D 朋友都有類似情形 (即係供就得你嗰份，住就大家有份)，我都唔算係最差嗰個，人呢，有時都需要自我平衡一下嘅！

我打算盡量抽時間係呢個 BLOG，作為我同佢生活嘅記錄，希望我會 keep 到啦!!!